Month: July 2025

काठमाडौं । गृहमन्त्री रमेश लेखकले नेपाली कांग्रेसका महामन्त्री गगन थापा र प्रमुख सचेतक श्यामकुमार घिमिरेसँग छलफल गरेका छन्।

सिंहदरबारस्थित कांग्रेस संसदीय दलको कार्यालयमा सोमबार मध्याह्न गृहमन्त्री, महामन्त्री र प्रमुख सचेतकबीच छलफल भएको हो।

गृहमन्त्री लेखकले महामन्त्री थापा र प्रमुख सचेतक घिमिरेसँग भूमि विधेयकबारे कुरा गरेका हुन्।

‘एमाले भूमि विधेयक फुल हाउसबाट पास गर्ने पक्षमा देखिएको छ,’ गृहमन्त्री लेखकले भनेका छन्।

तर महामन्त्री थापाले यसमा असहमति जनाएका छन्।

महामन्त्रीद्वय गगन थापा र विश्वप्रकाश शर्माले भूमि विधेयकमाथि संशोधन हालेका थिए। दुवै महामन्त्री भूमि विधेयकलाई समितिमा पठाएर छलफल गर्नुपर्ने पक्षमा छन्।

यसअघि प्रतिनिधि सभाको सम्भावित कार्यसूचीमा भूमि विधेयक परेपछि महामन्त्री शर्माले आपत्ति जनाएका थिए।

काठमाडौं । नेकपा (एमाले)को केन्द्रीय कमिटी बैठक सुरु भएको छ । पार्टी केन्द्रीय कार्यालय च्यासलमा सुरु भएको बैठकमा विधान संशोधनको प्रस्तावमा छलफल हुनेछ ।

संशोधन प्रस्तावमा ७० वर्षे उमेरहद र दुई कार्यकालको व्यवस्था हटाउनेलगायत विषय छन् ।

बैठकमा अध्यक्ष केपी शर्मा ओलीले राजनीतिक प्रतिवेदन र महासचिव शंकर पोखरेलले सांगठिनक प्रतिवेदन र उपाध्यक्ष विष्णु पौडेलले विधान संशोधन प्रस्ताव प्रस्तुत गर्ने तय भएको छ ।

संशोधन प्रस्तावमा एमालेमा पदेनसहित ३५५ जना केन्द्रीय सदस्य छन् । उनीहरूले संशोधन प्रस्तावमा आआफ्नो धारणा राख्नेछन् ।

काठमाडौं : नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले देशमा आर्थिक समृद्धिको लक्ष्य हासिल गर्न नीतिगत र समग्र राज्यले नै सोच्ने तरिका सुधार गर्न आवश्यक रहेको बताएका छन्।

सोमबार सिएनआइ (नेपाल उद्योग परिसंघ) का नवनिर्वाचित पदाधिकारीहरूसँग निजी निवास खुमलटारमा भेट गर्दै प्रचण्ड यस्तो बताएका हुन्।

भेटका क्रममा अध्यक्ष प्रचण्डले देशको आर्थिक विकासमा निजी क्षेत्रको योगदान महत्वपूर्ण रहेको उल्लेख गरे। उनले राज्यको माइन्डसेट परिवर्तन गरी निजी क्षेत्रलाई सहज वातावरणमा काम गर्न दिने नीतिगत सुधारको आवश्यकता औँल्याए।

‘निजी क्षेत्रलाई सहजीकरण गर्ने नीति र संरचना तयार नगरी समृद्धिको लक्ष्य हासिल गर्न सकिँदैन,’अध्यक्ष प्रचण्डले भने,’राज्यले दुःख दिने नभइ सहजीकरण गर्ने मनोवृत्ति विकास गर्न जरुरी छ।’

सिएनआइका पदाधिकारीहरूले पनि मुलुकको आर्थिक समृद्धिका लागि निजी क्षेत्रले खेलेको भूमिका र अध्यक्ष प्रचण्ड प्रधानमन्त्री हुँदा भएको सहकार्य वातावरण सशक्त रहेको स्मरण गराएका थिए।

काठमाडौँ । स्वास्थ्य तथा जनसङ्ख्यामन्त्री प्रदीप पौडेलले बालबालिकामा हुने मधुमेहको परीक्षण र उपचार निःशुल्क गर्ने तयारी गरिरहेको बताएका छन्।

नवलपरासी (बर्दघाट–सुस्तापूर्व) को गैँडाकोटमा आइतबार आयोजित मधुमेह परीक्षण तथा जनचेतना कार्यक्रममा उनले सातवटै प्रदेशमा सेवा सञ्चालनको तयारी गरिरहेको बताएका हुन्।

“बालबालिकामा हुने मधुमेह परीक्षण र उपचारका लागि सातवटै प्रदेशमा निःशुल्क गर्नेगरी हामीले काम अगाडि बढाइरहेका छौँ”, स्वास्थ्यमन्त्री पौडेलले भने, “बुढ्यौलीतर्फ उमेर ढल्किँदै गएपछि मधुमेह हुन्छ भन्ने मानसिकता समाजमा रहेको छ, तर बच्चाहरुलाई पनि यो रोग लाग्ने रहेछ।”

नेपालको स्वास्थ्य व्यवस्थामा बालबालिकामैत्री विशेष कार्यक्रम ल्याउनु जरुरी रहेको मन्त्री पौडेलको भनाइ छ। वंशानुगत रोगसहितका अन्य रोगका बारेमा विशेष कार्यक्रम ल्याएर बालबालिकालाई सम्बोधन गर्नुपर्ने उनले बताए।

“पछिल्लो समय समाजमा बालबालिकाका विषयमा थुप्रै समस्या देखिएका छन्”, उनले भने, “मोबाइल, टिभी, ल्यापटपसहितका डिजिटल उपकरण प्रयोग गर्न स्क्रिनमा हेर्ने विषयले समस्या निम्त्याउँदै गएको छ।”

बच्चाहरुलाई हुनसक्ने समस्याका बारेमा सबैले सावधानी अपनाउनुपर्ने र सरकारले उपचारमा सहजीकरण गर्नुपर्ने मन्त्री पौडेलले बताए। बालबालिका र ज्येष्ठ नागरिकको उपचारलाई निःशुल्क कसरी बनाउन सकिन्छ भन्नेतर्फ राज्यले नीति निर्माण गर्नुपर्ने उनको भनाइ छ।

“वृद्धवृद्धा र बच्चाका सन्दर्भमा यसको भार राज्यले बहन गर्नुपर्ने हुन्छ”, उनले भने, “यस विषयमा विभिन्न संस्था बनाएर अन्यत्र जिम्मा लगाउन मिल्दैन।” राज्यले स्वास्थ्योपचारमा सहयोग पुर्‍याउन सक्दैन भने त्यो लोककल्याणकारी राज्य नभएको उनले जिकिर गरे।

कार्यक्रममा नुरा हेल्थ फाउन्डेसनका देशीय निर्देशक डा. सुशील कोइरालाले मधुमेह दुई प्रकारको हुने उल्लेख गर्दै बालबालिकालाई लाग्ने यस रोगलाई ‘मधुमेह टाइप १’ नामकरण गरिएको बताए।

“पाका उमेरका व्यक्तिलाई हुने मधुमेहमा शरीरले उत्पादन गर्ने इन्सुलिनको मात्रा थोरै हुने तथा औषधि खाएर पनि नियन्त्रण गर्न सकिने हुन्छ”, उनले भने, “बालबालिकामा हुने मधुमेहमा शरीरले इन्सुलिन उत्पादन गर्दैन, जीवनभर सुइबाट इन्सुलिन दिएर जीवनरक्षा गर्नुपर्ने हुन्छ।”

मधुमेह टाइप १ लागेका बालबालिकाको सङ्ख्या धेरै भएको हुनसक्ने भन्दै उनले नेपालमा अहिले ६०० बिरामी सूचिकृत रहेको बताए।

“कति बिरामी उपचारका लागि आउनुभएको छैन, कतिले भारतमा गएर समेत उपचार गराइराख्नुभएको छ”, उनले भने, “मधुमेह लागेका बालबालिकाको एकिन तथ्याङ्क हामीसँग छैन।”

नेपालका विभिन्न पाँच अस्पतालबाट मधुमेह टाइप १ को उपचार भइरहेको उनले सुनाए। यो रोग किशोरावस्थामा सुरु हुने भएकाले यससम्बन्धी विशेष सतर्कता र सावधानी अपनाउनुपर्ने डा. कोइरालाको भनाइ छ।

उक्त कार्यक्रममा मधुमेह टाइप १ का बिरामी बालबालिकाले आफ्नो भोगाइ राखेका थिए। बिरामी भएर पनि समयमा उपचार गर्दा सामान्य जीवन बिताउन सकिने उनीहरुको भनाइ थियो।

गैँडाकोटमा रहेको विजय विकास स्रोत केन्द्रको ४७औँ स्थापना दिवसका अवसरमा आयोजित मधुमेह परीक्षणमा गैँडाकोट आधारभूत अस्पताल तथा क्वेस्ट फर्मास्युटिकल्स प्रालिले प्राविधिक सहयोग गरेका थिए।

कार्यक्रममा विजय विकास स्रोत केन्द्रका अध्यक्ष कृष्णप्रसाद सापकोटाले मधुमेहबारे स्वास्थ्य सचेतना आवश्यक रहेर कार्यक्रम गरिएको बताए।

स्वास्थ्य नै ठूलो धन भएकाले मानिस स्वस्थ हुनका लागि खानपान र जीवनशैलीमा सुधार ल्याउनुपर्ने अध्यक्ष सापकोटाको भनाइ छ।

काठमाडौँ- नेपाली कांग्रेसकी केन्द्रीय सदस्य तथा प्रतिनिधिसभा सांसद माया राईले नेपालमा बढ्दो युवा पलायन रोक्न शिक्षा प्रणालीमा आमूल सुधार आवश्यक रहेको बताएकी छन्।

रासससँगको कुराकानी उनले मुलुकमा पर्याप्त मात्रामा रोजगारीको अवसर नहुँदा युवा विदेशिन बाध्य भएको बताइन्। ‘अहिले आफ्ना सन्तानलाई राम्रो शिक्षा दिन सहर पस्नेको संख्या बढ्दो छ,त्यसपछि सहर हुँदै विदेश जाने क्रम तीव्र हुँदै गएको छ,’ सांसद राईले भनिन्,‘यसलाई रोक्न शिक्षा प्रणाली प्रविधिमैत्री,व्यावहारिक र रोजगारमुखी बनाउनु आवश्यक छ।’

सांसद राईले सरकारी विद्यालयप्रति आम जनताको विश्वास घटिरहेको बताइन्। उनले भनिन्,‘राजनीतिक दलका नेताका छोराछोरी निजी विद्यालयमा पढ्छन्,सरकारी विद्यालयमा सर्वसाधारणका मात्रै सन्तान छन्। यति मात्रै होइन,सरकारी विद्यालयका शिक्षकहरूले समेत आफ्ना छोराछोरी निजी विद्यालयमै पठाइरहेका छन्।’

उनले शिक्षकमै राजनीतिक पार्टीको सक्रिय सदस्यता लिएर काम गरिरहेको अवस्थालाई पनि आपत्तिजनक भन्दै यसले शिक्षा क्षेत्रमा गम्भीर असर परेको बताइन्। ‘शिक्षक राजनीतिमा संलग्न हुनु अब अन्त्य हुनुपर्छ,’ उनले भनिन्,‘सरकारले शिक्षामा सुधार ल्याई रोजगारी सिर्जना गर्ने नीतिमा जोड दिनुपर्छ। रोजगारी नभएसम्म विदेशिने बाध्यता हट्दैन।’

रोजगारीको अवसर सिर्जना गर्न सरकारले निजी क्षेत्रसँग सहकार्य गर्दै मुलुकमै उत्पादनशील उद्योग तथा व्यवसायमा लगानी बढाउनुपर्ने उनको सुझाव छ।