Month: June 2025

काठमाडौं : नेपाल आइडल सिजन ६ मा उत्कृष्ट १६ प्रतिस्पर्धीको टुंगो लागेको छ। सुरुवाती चरणदेखि विभिन्न राउण्ड पार गर्दै उनीहरू अन्तिम प्रतिस्पर्धासम्म आइपुगेका हुन्।
अर्को हप्तादेखि गाला राउण्ड सुरु हुने आयोजकले जनाएको छ। १६ जनाबाट उत्कृष्ट ८ प्रतिस्पर्धी छानिने आयोजकले जनाएको छ। त्यसपछि ८ जना बटममा पर्दै भोट माग्नेछन्। भोटिङको आधारमा हरेक हप्ता टप १० सम्म २/२ जनाले र टप १० पछि १/१ जनाले नेपाल आइडलको मञ्च छोड्नेछन ।

जज अडिसनबाट गोल्डेन माइक पाएका थिए । गोल्डेन माइक पाउनेमा सिक्किमका मिलन विश्वकर्मा, चितवनका दर्शना गान्धारी र बुटवलका आभाष काफ्ले रहेका थिए। अब आभाष काफ्लेले आफ्नो प्रस्तुतिको हिसाबमा प्रि गाला राउन्डबाट नेपाल आइडलको मञ्च छोडिसकेका छन्। यससँगै अब बाँकी गोल्डेन माइक दुई जनासहित १६ जना रहेका छन्।

यस सिजन अघिल्ला सिजनभन्दा फरक र विशेष बनाइएको छ। यसपटकको सिजनमा प्रतियोगीहरूले जज राउण्डदेखि नै ब्याकअप ब्यान्डको साथ प्रस्तुति दिएका छन्। जसले उनीहरूको प्रस्तुतिलाई अझ उत्कृष्ट बनाउन सहयोग पुगेको छ। नेपाल आइडलका एक्स्ट्रा एपिसोडहरू पनि प्रसारण गरिएको छ। यसले दर्शकलाई पर्दा पछाडिका रोचक कथाहरू प्रस्तुत गरिरहेको छ।

जज राउण्ड बाट अर्को थिएटर राउन्डमा ७८ जना छनोट भए। थिएटरबाट अर्को प्रि गाला राउण्डका लागि गोल्डेन माइकसहित २३ जना छानिएका थिए। त्यस्तै प्रि गालाबाट गाला राउण्डका लागि आफ्नो प्रतिस्पर्धाका आधारमा जजहरूले २३ जनाबाट ७ जनालाई आउट गर्दै टप १६ प्रतिस्पर्धी छानिएका थिए। यस सिजनमा सुरुदेखि नै सबै प्रतिस्पर्धी उत्कृष्ट भएकाले जजहरुलाई पनि यसबाट अझै उत्कृष्ट छान्न हम्मे हम्मे नै पर्‍यो।

नेपाल आइडलले नेपाली संगीत क्षेत्रका उदीयमान तथा लुकेका प्रतिभालाई उजागर गर्ने महत्त्वपूर्ण मञ्चको रूपमा आफूलाई स्थापित गर्दै आएको छ। यसले नेपाली दर्शकमाझ अझ गहिरो प्रभाव पार्ने विश्वास लिइएको छ। सिजन ६ को निर्देशकका रूपमा सुरेश पौडेल र एलेन श्रेष्ठ रहेका छन्। निर्णायक मण्डलमा सुरुवाती तीन सिजन तथा पाँचौं सिजनका निर्णायकहरू न्ह्यु बज्राचार्य, कालीप्रसाद बाँस्कोटा र इन्दिरा जोशी रहेका छन् भने कार्यक्रम प्रस्तोता आसिफ शाह रहेका छन्।

हालसम्म नेपाल आइडलका पाँच विजेता क्रमशः बुद्ध लामा, रवि ओड, सज्जा चौलागाईं, भूपेन्द्र थापा मगर र करण परियार रहेका छन्। सिजन ६ ले पनि राम्रो प्रतिक्रिया पाइरहेको छ।

नेपाल आइडलको सिजन ६ को टाइटल स्पोन्सरका रूपमा कोकाकोला रहेको छ भने एक्सकुसिभ भोटिङ पार्टनरका रुपमा इसेवा र अन्तर्राष्ट्रिय भोटिङ पार्टनरको रूपमा मो:मो एप रहेको छ। नेपाल आइडलको एपिसड हरेक शुक्रबार र शनिबार गरी दुई दिन एपीवान टेलिभिजनबाट प्रसारण भइरहेको छ। टेलिभिजनमा ८:३० बजे प्रसारण भइरहेको छ भने नेपाल आइडलको युट्युब च्यानलमा ९:१५ मा प्रसारण भइरहेको छ ।

यी हुन् १६ प्रतिस्पर्धीहरू

मिलन विश्वकर्मा – सिक्किम – गोल्डेन माइक
दर्शना गान्धारी- चितवन गोल्डेन – गोल्डेन माइक
बबिता थापा मगर – सिक्किम
म्रिनल मानन्धर – काठमाडौँ
पिटु गहतराज – बारा
गङ्गा सोनम – सिन्धुपाल्चोक
सुस्मिता एर्गेट – सिलिगुरी
आशा राई – पोखरा
महेश्वर भट्टराई (उज्ज्वल)- काठमाडौँ
जितेन्द्र गुरुङ (जिदान) – गोरखा
निरज विश्वकर्मा – डोटी
राज सायमी – चितवन
नितेन मोक्तान – इटहरी
रिजन थापा – इटहरी
अभिनय खाती – दार्जिलिङ
प्रसन्न धमला – ललितपुर

काठमाडौं– राष्ट्रपति रामचन्द्र पौडेलले सहज, सरल र प्रभावकारी तवरले सेवाप्रवाह गरेर कर्मचारीतन्त्रले नागरिकको मन जित्नसकेमा लोकतन्त्र दरिलो हुने वास्तविकतालाई मनन गरेर राष्ट्रसेवकहरूले भूमिका निर्वाह गर्नुपर्ने बताएका छन् ।
लोक सेवा आयोगको आज आयोजित हीरक जयन्ती समारोहमा उनले स्थायी सरकारका रूपमा रहेको कर्मचारीतन्त्रले आधुनिक विधि, प्रविधि र दक्ष जनशक्तिको प्रयोग गरी सुशासनको मर्मअनुरूप काम गरेमा सङ्घीय लोकतान्त्रिक गणतान्त्रिक शासन प्रणालीमा जनताका चाहनालाई सम्बोधन गर्न सकिने बताए ।

उनले भने, ‘अब सहज, सरल र प्रभावकारी तवरले सेवाप्रवाह गरेर कर्मचारीतन्त्रले नागरिकको मन जित्न सक्नुपर्छ । कर्मचारीतन्त्रले जबसम्म नागरिक हकका निम्ति सहज पहुँच दिन सक्दैन, तबसम्म लोकतन्त्र दरिलो हुन सक्दैन भन्ने वास्तविकतालाई बिर्सन हुँदैन ।’

राष्ट्रपति पौडेलले मुलुक सञ्चालन गर्ने सरकारी निकायमा स्थायी सरकारका रूपमा रहने योग्य कर्मचारी छनोट गर्ने संवैधानिक जिम्मेवारी पाएको लोकसेवा आयोगले ७५ वर्षमा आफ्नो मूल सिद्धान्त ‘योग्यता, निष्पक्षता र स्वच्छता’लाई प्रमुख आधार मान्दै निरन्तर क्रियाशील रहनु प्रशंसनीय कार्य भएको बताए ।

उनले भने, ‘आफ्नो भूमिका निर्वाह गर्दै आयोगले सदैव वर्तमान पुस्ताप्रति न्याय तथा भविष्यका पुस्ताप्रतिको आशा एवं भरोसाको केन्द्रका रूपमा आफ्नो कर्तव्य, दायित्व, जिम्मेवारी निर्वाह गर्न चनाखो हुन जरुरी छ ।’

स्वउत्प्रेरित, उच्च नैतिकवान्, अनुशासित, जिम्मेवार र राष्ट्रप्रति सद्भाव भएका कर्मचारीले मात्र मुलुकमा प्रभावकारी ढङ्गले कार्यसम्पादन गर्न सक्छन् भन्ने यथार्थलाई स्मरण गराउँदै राष्ट्रपति पौडेलले भने, ‘आयोग सरकारी सेवामा कर्मचारी छनोट र भर्नाको जग हो । यसले सदैव असल र उम्दा कर्मचारी छनोट गर्न सक्ने गरी सकेसम्म योग्यताका सबै पक्षहरू पूर्वानुमान गर्न सकिने खालका परीक्षण विधिहरू अवलम्बन गर्नुपर्छ ।’

काठ्माण्डौँ- प्रधानमन्त्री केपी शर्मा ओलीले मुलुकको शासन प्रणाली प्रभावकारी रूपमा सञ्चालन गर्न सक्षम कर्मचारीतन्त्रको आवश्यकता अपरिहार्य रहेको बताएका छन्। लोकसेवा आयोगको ७५ औँ वार्षिकोत्सव तथा हिरक जयन्तीको अवसरमा आइतबार काठमाडौँमा आयोजित कार्यक्रमलाई सम्बोधन गर्दै प्रधानमन्त्री ओलीले यस्तो बताएका हुन्।
‘शासन व्यवस्था प्रभावकारी रुपमा संचालनका लागि सरकार र प्रशासनको महत्वपूर्ण रहेको हुन्छ। सरकारले नेतृत्वले आवश्यक नीति निर्माण गर्ने, व्यवस्थापिकाले कानून बनाउने र प्रशासन संयन्त्रले त्यसको कार्यान्वयनमा लागि सूचना संकलन गर्ने तथा सहयोग गर्ने गराउने बाध्यता छ,’ उनले भने, ‘कर्मचारीतन्त्र राजनीतिभन्दा फरक तर राजनीतिको समिपमा रहेर काम गर्ने संस्था हो। कुनै पनि मुलुकको सरकारको कार्यसफलता कर्मचारीको सक्षमतामा पनि धेरै हदसम्म निर्भर रहन्छ । तसर्थ मुलुक सञ्चालनका लागि आवश्यक कर्मचारी योग्य, दक्ष र निपूर्ण हुनुका अतिरिक्त स्वस्थ पनि हुनुपर्छ। लोक सेवा आयोगले जति स्वतन्त्र, निष्पक्ष, प्रभावकारी तथा वस्तुनिष्ट तवरले कर्मचारी छनोट गर्न सक्दछ । मुलुकको प्रशासनिक संयन्त्र त्यति नै बलियो र प्रभावकारी हुँदै जान्छ।’

सक्षम, योग्य र निष्पक्ष कर्मचारी प्रशासनिक व्यवस्थाको मेरुदण्ड भएको उनको भनाइ छ।

प्रधानमन्त्री ओलीले सरकार, व्यवस्थापिका र प्रशासन संयन्त्रबीचको सहकार्यलाई सुदृढ बनाउने कुरामा जोड दिँदै सरकार र व्यवस्थापिकाले बनाएका नीति तथा कानूनहरु कार्यान्वयन लागि महत्वपूर्ण भूमिका खेल्ने बताए। उनले आयोगले मुलुकको प्रशासनिक संयन्त्र सञ्चालनका लागि महत्वपूर्ण भूमिका खेलिरहेको उल्लेख गर्दै प्रशंसा गरे।

काठमाडौँ : नेकपा (माओवादी केन्द्र) देवेन्द्र पौडेलले इरान र इजरायलमा रहेका नेपालीहरूको सुरक्षाको लागि पहल गर्न सरकारसँग आग्रह गरेका छन् ।

प्रतिनिधि सभाको आइतबारको बैठकमा बोल्दै उनले यस्तो आग्रह गरेका हुन् ।

करिब ७ हजार नेपाली इजरायलमा र केही नेपालीहरू इरानमा पनि रहेको भन्दै उद्धारका लागि छिटो पहल गर्न आग्रह गरे । उनले इजरायल र इरानमा रहेका नेपालीहरूको सुरक्षाका लागि कूटनीतिक वृत्तबाट तदारुकतासथ पहल गर्न आग्रह गरे ।

सचिव पौडेलले भने ‘इजरायल र इरानबिच भीषण लडाइँ भइरहेको छ । ७ हजार भन्दा बढी नेपालीहरू इजरायलमा छन् । केही संख्यामा इरानमा पनि नेपालीहरू रहेका छन् । उहाँहरूको सुरक्षाको निम्ति नेपाल सरकारले के पहल भइरहेको छ रु उहाँहरूको सुरक्षाका लागि कूटनीतिक वृत्तबाट तदारुकतासथ पहल होस् ।’

बाढी र पहिरोका कारण देशका विभिन्न ठाउँमा यातायात प्रणाली अवरुद्ध भएको भन्दै छिटो मर्मतगरी सुचारु गर्न आग्रह गरे ।

काठमाडौं- सात बुँदे घोषणापत्र जारी गर्दै दोस्रो अन्तर्राष्ट्रिय मातृभाषा पत्रकारिता सम्मेलन ११४५ सम्पन्न गरेको छ । दुईदिने सम्मेलनमा बंगलादेश, भारत र नेपालका विभिन्न प्रदेशबाट पत्रकारहरुको गुणात्मक सहभागिता रहेको थियो ।
अन्तर्राष्ट्रिय सम्मेलनमार्फत मातृभाषाको पत्रकारितालाई प्रवद्र्धन गर्नुपर्ने, नेपाल सरकार लगायत सार्क राष्ट्रका सरकार प्रमुखहरुले मातृभाषाको पत्रकारिता गर्ने अधिकार सुनिश्चित गर्नुपर्ने, सरकारी स्तरमा नीति तर्जुमा गरेर वजेटको व्यवस्था गर्नुपर्ने लगायतका माग गरेका छन् । दुईदिने सम्मेलनलाई उद्घाटन गर्नुहुँदै प्रतिनिधि सभाका सभामुख देवराज घिमिरेले मातृभाषाको पत्रकारितामार्फत नेपालको संविधानले सुनिश्चित गरेको बहुल समाजभित्रको एकतालाई व्यवहारमा लागू गर्न सकिने बताए। उनले सरकारी सञ्चार माध्यममा भाषाभाषीका समाचार प्रकाशन र प्रशारण हुँदै आएको सन्दर्भ जोड्दै यसमा थप समृद्ध गर्नुपर्ने विचार राखे ।

त्यस्तै, भक्तपुरको थिमि बैंक्वेटमा सम्पन्न भएको दोस्रो दिनको सम्मेलनमा मध्यपुर थिमि नगरपालिकाका मेयर सुरेन्द्र श्रेष्ठले मातृभाषा संरक्षण गर्न स्थानीय सरकार प्रतिबद्ध रहेको बताएका छन् । विद्यालयस्तरमा मातृभाषाको अध्यापन गर्नको लागि नगरपालिकाले तयारी गरिरहेको समेत मेयर श्रेष्ठले बताए ।

पत्रकार राष्ट्रिय दबूका केन्द्रीय अध्यक्ष नृपेन्द्र लाल श्रेष्ठले भने,‘नेपालका प्रथम मातृभाषी पत्रकार धर्मादित्य धर्माचार्यले नेपालभाषाको माध्यमबाट पत्रकारिता सुरु गर्नुभएको १०१ वर्ष पुगेको उपलक्ष्यमा सम्मेलनको आयोजना गरेका हौं । सबैले आआफ्नो क्षेत्रबाट सक्दो सहयोग गर्नुभएको छ ।’

करिब ५० विदेशी पत्रकार तथा सय जना नेपाली पत्रकारहरु समिल्लित रहेको अन्तर्राष्ट्रिय सम्मेलनलाई सार्क जर्नलिष्ट फोरम र फोनिजले सहकार्य गरेको थियो । सम्मेलनमा नेपाल लगायत विश्वव्यापी रहेको मातृभाषा पत्रकारिताको चुनौती, अवसर र भविष्यका सम्भावनाहरूमा केन्द्रीत रहेर विभिन्न चरणमा प्यानल छलफल गरेको थियो ।

गोरखापत्रका पूर्व प्रधान सम्पादक पुस्करभक्त माथेमाले नेपालको सरकारी सञ्चार गृहमा मातृभाषाको पत्रकारिताको अभ्यासको विषयमा कार्यपत्र प्रस्तुत गरेका थिए । कार्यक्रममा नेपाल, भारत र बंगलादेशका गरी पाँच जना वरिष्ठ सञ्चारकर्मीहरुलाई नेपालका प्रथम मातृभाषी पत्रकार धर्मादित्य मातृभाषा पत्रकारिता सम्मान प्रदान गरिएको थियो । यसअघि सन् २०२४ मा पहिलो अन्तर्राष्ट्रिय मातृभाषा पत्रकारिता सम्मेलन, सन् २०१८ र २०२२ मा राष्ट्रिय सम्मेलन गरेको थियो ।

काठमाडौँ- सभामुख देवराज घिमिरेले संसदमा जारी अवरोधबारे आज बिहान रास्वपा कार्यवाहक अध्यक्ष डीपी अर्याल र राप्रपा अध्यक्ष राजेन्द्र लिङ्देनसँग अलग अलग छलफल गरेका छन्।
रास्वपा कार्यवाहक अध्यक्ष अर्यालसँग बानेश्वरस्थित कार्यकक्षमा छलफल गर्दै सभामुखले संवैधानिक सीमाका कारण बजेटमाथिको छलफल सुरु गर्नैपर्ने बाध्यता रहेको, अवरोधको स्वरूप बदल्न आग्रह गरे।

सभामुखले सदनलाई मर्यादित बनाउन समेत ध्यानाकर्षण गराए। रास्वपा कार्यवाहक अध्यक्ष अर्यालले आफूहरूको अवरोध जारी रहने बताउँदै संसद्लाई मर्यादित बनाउने प्रतिबद्धता जनाए।

गत शुक्रबारको बैठकमा अवरोधका क्रममा संसदीय मर्यादाविपरीतका गतिवधि भएकोबारे बिहान भएको बैठकमा प्रमुख सचेतकहरूले सभामुखको ध्यानाकर्षण गराएका थिए।

सभामुखले अध्यक्ष लिङ्देनलाई पनि संवैधानिक बाध्यता बुझिदिन आग्रह गर्दै संसद्को अवरोध हटाउन आग्रह गरेका थिए।

अध्यक्ष लिङ्देनसँग टेलिफोन गर्दै सभामुखले संसद्मा आफ्ना विषयलाई राखेर सदन चल्ने वातावरण बनाउन सहयोग गर्न आग्रह गरे।

काठ्माण्डौँ- सञ्चार तथा सूचना प्रविधि मन्त्रालयले राष्ट्रिय समाचार समिति (रासस)को महाप्रबन्धक पदका लागि दरखास्त आह्वान गरेको छ।
मन्त्रालयले १३ वटा बुँदामा योग्यता निर्धारण गरेर महाप्रबन्धकमा दरखास्त आह्वान गरेको हो।

योग्यता पुगेका इच्छुक नेपाली नागरिकले असार १५ गतेसम्म आवेदन दिन सक्नेछन्।