एसियालाई अब शान्तिको प्रवक्ता बनाउनुपर्छ : पूर्वराष्ट्रपति भण्डारी

काठमाडौं । चीनको भ्रमणमा रहेकी पूर्वराष्ट्रपति विद्यादेवी भण्डारीले चिनियाँ कम्युनिस्ट पार्टीको अन्तर्राष्ट्रिय विभागले आयोजना गरेको सम्मेलनलाई सम्बोधन गरेकी छिन्।

सोमबार बेइजिङमा आयोजित छिमेकी देशका राजनीतिक दलहरूसँग संवाद सम्मेलनलाई  सम्बोधन गर्दै उनले नेपालका दल र चिनियाँ कम्युनिस्ट पार्टीबीच नीति संवादका लागि संस्थागत संरचना बनाउनुपर्नेमा जोड दिइन्।

त्यस्तै युवा नेताहरूबीच आदान–प्रदान बढाउनुपर्ने, क्षेत्रीय शान्ति र स्थायित्वमा दलहरूको भूमिका खोजिनुपर्नेमा पनि भण्डारीको जोड थियो। एसियालाई अब शान्तिको प्रवक्ता बनाउनुपर्ने मत समेत उनले राखेकी थिइन्।

चिनियाँ कम्युनिस्ट पार्टीको विदेश विभाग प्रमुख लिउ जियान्चाओले पनि सम्बोधन गरेको कार्यक्रममा भण्डारीले नेकपा एमाले र सिपिसीबीच विचार, व्यवहार र रणनीतिक सम्बन्ध रहेको भनाइ राखेकी थिइन्।

भण्डारी नेतृत्वको १० दिने भ्रमण टोलीमा  एमाले सचिव तथा परराष्ट्र विभाग प्रमुख रघुवीर महासेठ, उद्योग, वाणिज्य तथा आपूर्तिमन्त्री दामोदर भण्डारी, एमाले नेता एवं पूर्वमन्त्री कर्णबहादुर थापा लगायत छन्।