नेपालको समस्या स्रोतको अभाव होइन, गलत प्रोत्साहन संरचना हो: वाग्ले

राष्ट्रिय स्वतन्त्र पार्टी (रास्वपा) का उपसभापति एवं अर्थमन्त्री डा. स्वर्णिम वाग्लेले नेपालको मुख्य समस्या स्रोत वा सम्भावनाको अभाव नभई गलत प्रोत्साहन संरचना रेहको बताएका छन्।

चितवनमा जारी पार्टीको पहिलो राष्ट्रिय महाधिवेशनलाई सम्बोधन गर्दै उनले राजनीतिमा इमानदार मानिसलाई प्रवेश गर्न कठिन तर पहुँचवालालाई सफल हुन सजिलो हुने प्रणाली बनेको टिप्पणी गरे।

उनले भने, ‘हाम्रो समस्या गलत प्रोत्साहन संरचना हो। व्यवसायमा नवप्रवर्तन गर्न कठिन छ, तर शक्ति केन्द्रको निकट हुनेलाई सबै कुरा सहज हुने व्यवस्थाले मुलुक पछाडि परेको छ।’

राज्य संयन्त्रले सिर्जना भन्दा बाँड्ने, प्रतिस्पर्धा बढाउनु भन्दा नियन्त्रण गर्ने र अवसर विस्तारको साटो पहुँचको संरक्षण गर्ने संस्कार विकास गरेको उनको तर्क थियो।

रास्वपाको राजनीतिक उद्देश्य केवल सरकार फेर्नु मात्र नभई समग्र राजनीतिक संस्कार परिवर्तन गर्नु रहेको उनले सुनाए।

उपसभापति वाग्लेले रास्वपाले भागबन्डाको राजनीति अन्त्य गरी ‘मेरिटोक्रेसी’ मा आधारित शासन व्यवस्था स्थापना गर्न चाहेको बताए।

‘हामी विवेक, विधि र नियममा आधारित शासनतर्फ जान चाहन्छौं,’ उनले भने, ‘नागरिक केन्द्रित लोकतन्त्र नै हाम्रो गन्तव्य हो।’

रास्वपा अब आन्दोलनको पार्टीबाट संस्थागत राजनीतिक शक्तिमा रूपान्तरण भइरहेको उनले बताए। नयाँ पुस्ताले प्रश्न मात्र सोध्ने नभई उत्तर पनि दिन सक्ने, विरोध मात्र नगरी शासन पनि चलाउन सक्ने र सपना मात्र नदेखाई परिणाम पनि दिन सक्ने उनको दाबी थियो।