काठमाण्डौं सहित चार जिल्लामा कर्फ्यु

काठमाडौँ,२३ भदौ ।
सामाजिक सञ्जालमाथिको प्रतिबन्ध र भ्रष्टाचार विरोधी जेन–जी’ को सोमबारको प्रदर्शन नियन्त्रण बाहिर गएपछि काठमाडौंसहित चार जिल्लामा स्थानीय प्रशासनले कर्फ्यु जारी गरेको छ ।

जिल्ला प्रशासन काठमाडौंले दिउँसो साढे १२ बजेदेखि नै माइतीघर, बानेश्वर, तीनकुने र शंखमूल आसपासमा राति १० बजेसम्मका लागि कर्फ्यु लगाइएको हो ।

त्यस्तै सुनसरीको इटहरीमा कर्फ्यु लगाइएको छ । सोमबार दिउँसो प्रदर्शन उग्र बनेपछि जिल्ला प्रशासन कार्यालय सुनसरीमा दिउँसो साढे ३ बजेदेखि अर्को सूचना नभएसम्म इटहरीको मुख्य चोक आसपासका क्षेत्रमा कर्फ्यु आदेश जारी गरिएको प्रमुख जिल्ला अधिकारी धर्मेन्द्र मिश्रले जानकारी दिए ।

यसैगरी कास्कीको पोखरामा पनि अनिश्चितकालीन कर्फ्यु लगाइएको छ । जिल्ला प्रशासन कार्यालय कास्कीले जेन–जीहरूको प्रदर्शनका क्रममा झडप भएपछि स्थिति नियन्त्रणमा लिन दिउँसो २ बजेदेखि चार किल्लाभित्र पाँच जनाभन्दा बढी भेला हुन नपाउने गरी जुलुस, धर्ना र प्रदर्शन निषेध गरिएको छ ।

बुटवल र भैरहवामा समेत जेन जीको प्रदर्शन नियन्त्रण बाहिर गएपछि जिल्ला प्रशासन कार्यालय रुपन्देहीले कर्फ्यु जारी गरेको छ ।
जिल्ला प्रशासन कार्यालयले सोमबार अपराह्न ४ बजेदेखि राति १० बजेसम्मका लागि कर्फ्यु जारी गरेको छ ।