नयाँ पत्रिकाका पत्रकार दीपेन्द्र ढुंगानालाई लाग्याे प्रहरीकाे गाेली

नयाँ पत्रिकाका फोटो पत्रकार दीपेन्द्र ढुंगानालाई गोली लागेको छ । उनी बिहानैदेखि जेन–जीकाे आन्दोलनको तस्वीर खिच्न माइतीघर मण्डलादेखि बानेश्वरसम्म पुगेका थिए । तर, बानेश्वरकाे निषेधित क्षेत्र तोड्दै अघि बढेका प्रदर्शनकारी र प्रहरीबीच पटकपटक झडप भएको थियो । प्रहरीले अश्रुग्यास हान्दै प्रदर्शनकारीलाई नियन्त्रणमा लिने प्रयास गरे पनि सम्भव नभएपछि प्रहरीले रबरका गोली चलाएकाे थियो ।

सोही क्रममा ढुंगानामाथि समेत गोली प्रहार भएको हो । उनीसँगै नेपाल प्रेस अनलाइनका पत्रकार उमेश कार्कीलाई पनि गोलीको छर्रा लागेको छ । उनीहरूको सिभिल अस्पतालमा उपचार भइरहेको छ ।

यसअघि कान्तिपुर टीभीका पत्रकार श्याम श्रेष्ठलाई गोली लागेको थियो । उनकाे पनि सिभिल अस्पतालमा उपचार भइरहेको छ । उनी खतरामुक्त रहेको बताइएकाे छ ।