गौरामय बन्यो न्यूयोर्क, देउडा गायक जोशीले सबैलाई बनाए मन्त्रमुग्ध
न्यूयोर्क,(अमेरिका), ३१ अगष्ट ।
विगतका वर्ष झै यस पटक पनि अमेरिकाको न्यूयोर्कमा गौरा पर्व धुमधामसंग मनाईएको छ ।
सुदूर पश्चिम नेपाली समाज अमेरिका न्यूयोर्कको आयोजनामा शनिवार न्यूयोर्कको दिव्यधाममा गौरा पर्व धुमधामसंग मनाईएको हो ।
गौरा पर्वका अवसरमा गौरी पूजा, दुबधागो अभिषेक, गौरादेवी र महेश्वर नृत्य, प्रसाद वितरण, गौरा सेलाउने लगायतका कार्य बिधि पूर्वक गरिए ।
गौरा पर्वका अवसरमा आयोजित कार्यक्रममा सुदूर पश्चिमका चर्चित देउडा गायक नन्दकृष्ण जोशीको प्रस्तुतीले कार्यक्रम देउडामय भयो । जोशीको देउडाले सबैलाई मन्त्रमुग्ध बनायो ।
कार्यक्रममा गौरा पर्व संयोजक रैभान महराले सुदूर पश्चिमको मौलिक बाजा दाईना दमाउ बजाएर सबैलाई आकर्षित गरे ।
कार्यक्रममा न्यूयोर्कका बिभिन्न भागबाट गौरा पर्वमा सहभागी भएका सुदूरपश्चिमेलीसंगै अन्य समुदायका व्यक्तिहरुले देउडा खेलेर भरपुर मनोरञ्जन लिए ।
कार्यक्रमका प्रमुख अतिथि न्यूयोर्कस्थित नेपाली महावाणिज्यदूतावासका महावाणिज्यदूत दधिराम भण्डारीले प्रवासमा आफ्नो मौलिक पर्व गौराको संरक्षण र सम्बद्र्धनका लागि सुदूर पश्चिम समाज अमेरिका, न्यूयोर्कले कार्यक्रम आयोजना गरेकोमा प्रशंसा गरे ।
समाजका अध्यक्ष दान सिंह बिष्टले गौरा पर्वमा सम्पूर्ण सहभागी र सहयोगी संघसंस्था र व्यक्तिलाई धन्यवाद दिए ।
त्यस्तै कार्यक्रममा बिशिष्ट अतिथि सुदूरपश्चिमका चर्चित देउडा गायक नन्दकृष्ण जोशी, सुदूर पश्चिम नेपाली समाज अमेरिकाका अगुवा जीवन बम, रिजउड नेपाली सोसाईटीका अध्यक्ष राजेश भट्ट र गैर आवासीय नेपाली संघ अमेरिकाकी सचिव लक्ष्मी थापाले शुभकामना मन्तव्य व्यक्त गरिन् ।
कार्यक्रममा प्रशंसा समूह नेपालका मोहन सिंह ऐतवाल, बरिष्ठ लोक गायक नविन ढुंगेल, बिमल डांगी र आभ्या ढुंगेलको उपस्थिति रहेको थियो ।
सुदूर पश्चिम नेपाली समाज अमेरिका, न्यूयोर्कका अध्यक्ष बिष्टको अध्यक्षतामा सम्पन्न भएको कार्यक्रमको सञ्चालन गौरा संयोजक रैभान महराले गरेका थिए । कार्यक्रममा समाजकी सह- कोषाध्यक्ष सुनी गुरुङले स्वागत मन्तव्य व्यक्त गरेकी थिईन् ।
ट्रेन्डिङ
सम्बन्धित
