कैलाली उद्योग वाणिज्य संघ निर्वाचन : १८ बुँदे प्रतिवद्धता सहित स्वाँरले घोषणा गरे प्यानल
कैलाली । आगामी भदौ २८ गते हुने कैलाली उद्योग वाणिज्य संघको नेतृत्वका लागि प्रतिस्पर्धामा उत्रिएका अध्यक्ष पदका उम्मेदवार रुपेश स्वाँरले आफ्नो प्यानल सार्वजनिक गरेका छन् ।
आईतबार धनगढीमा आयोजित कार्यक्रममा स्वाँरले विभिन्न पदका उम्मेदवारसहितको टिम प्रस्तुत गर्दै संघलाई व्यवस्थित, पारदर्शी र व्यवसायमैत्री बनाउन १८ बुँदे प्रतिवद्धता सार्वजनिक गरेका हुन । स्वाँर नेतृत्वको प्यानलमा वरिष्ठ उपाध्यक्षमा केशवराज जोशी, उद्योग उपाध्यक्षमा लक्ष्मणराज पन्त, वाणिज्य उपाध्यक्षमा राधिका कुमारी चौधरी, एशोसियट उपाध्यक्षमा अनिलकुमार भुजनिया, बस्तुगत उपाध्यक्षमा सिद्धराज पनेरु, महासचिवमा सुरेश पाण्डेय, सचिवमा प्रकाशकुमार चन्द र कोषाध्यक्षमा तिलक बहादुर बोहरा छन् ।
त्यस्तै, सदस्य तर्फ रुपेश खड्का, अम्बिका भण्डारी, मिलन कुँवर, प्रेम बहादुर धामी, भरत बहादुर थापा, नेत्र प्रसाद तिवारी, देव राज जोशी, तेज बम, शुभ शंकर ठाकुर, दिपक राठोर, अमर चोखाल, प्रमिला पाठक र मञ्जु भट्ट रहनेछन् ।
स्वाँर प्यानलले सार्वजनिक गरेका मुख्य प्रतिवद्धता व्यवसायीका कानुनी र प्रशासनिक समस्या समाधान, युवा उद्यमीलाई सहयोगका लागि कोष, विपद व्यवस्थापन कोष स्थापना, सीमापार अवैध व्यापार नियन्त्रण, आयात–निर्यात सहज बनाउन नाकामा हेल्पडेस्क, धनगढीका बजारमा रात्रीकालीन व्यवसाय सुरु गर्ने पहल, घरबहालसम्बन्धी कानुनी व्यवस्था, लगानी सम्मेलन आयोजना, गुनासो सम्बोधन संयन्त्र र औद्योगिक पूर्वाधार विकासलाई प्राथमिकता दिने घोषणा पत्रमा उल्लेख छ ।
सुदूरपश्चिम महोत्सवलाई व्यवस्थित गर्दै स्थानीय उत्पादन, कला–संस्कृति र आर्थिक समृद्धिमा टेवा पु¥याउने योजना पनि स्वाँरको प्रतिवद्धतामा समेटिएको छ ।
ट्रेन्डिङ
ताजा समाचार
सम्बन्धित
