बिजुली माग्दै सुदूरपश्चिमवासी : दिउँसै लालटिन बालेर काठमाडौंमा गरे प्रदर्शन

अछाम : बिजुली माग गर्दै सुदूरपश्चिमका युवाहरूले काठमाडौंमा प्रर्दशन गरेका छन् । काठमाडौंको माइतिघर मण्डलामा बोलन्या थलीको संयोजकत्वमा युवाहरूले दिउँसै लालटिन बालेर शान्तिपूर्ण प्रर्दशन गरेका हुन् । अछामलगायत सुदूरपश्चिमका धेरै गाउँहरूमा लालटिन बाल्नुपर्ने बाध्यता रहेको भन्दै दबाबमुलक प्रदर्शन गरिएको हो । युवाहरू सुदूरपश्चिमी भाषामा लेखिएको प्ले कार्डसहित शान्तिपूर्ण प्रदर्शनमा सहभागी भएका थिए।

उनीहरूले अधुरा पोलहरूका तार जोड,चार हजार परिवारको उज्यालोको अधिकार खोल,अछाम अँध्यारो भयोलगायतका प्ले कार्ड प्रर्दशन गरेका थिए । ठेकेदारको लापरवाही र विद्युत प्राधिकरणको गैरजिम्मेवारी पनका कारण भइरहेका काम समेत अलपत्र परेको उनीहरूको आरोप छ । तुर्माखाँद गाउँपालिकाको भुलु रहफ,ढकारी गाउँपालिकाको बलाता, ढुंगाचाल्ना, कमलबजार नगरपालिकाकाका  क्वाल्लेख,जामा,फल्टानेलगायत विकट गाउँमा विद्युत पुग्न नसकेको र लालटिनकै साहारामा बस्नु परेको स्थानीय कमलबजार नगरपालिका स्थानीय महेश जैशीले बताए ।

बोलन्या थलीका संयोजक यादव जोशीले सरकार र विधुत प्राधिकरण बिजुली  बेचेर अर्बौं फाइदामा गयौं भन्दै खुशी मनाउँदा सुदूरपश्चिमका बासिन्दा अँध्यारोमा रात काट्नुपर्ने बाध्यात्मक अवस्था रहेको बताए । अछाम,दार्चुला,डडेल्धुरालगायतका जिल्लाका विकट बस्तीमा बिजुलीका लागि सरकारलाई लालटिन बालेर खोज्दै प्रदर्शन गरेको उनले बताए ।

विद्युत प्राधिकरण अछाम केन्द्रका प्रमुख हिक्मतबहादुर बिसीका अनुसार अहिले अछाममा ७० प्रतिशत पूर्ण विधुतिकरणको काम सम्पन्न भएको र बाँकी ठेक्कामार्फत् विधुतिकरणको काम जारी रहेको बताए । उनले हाल ठेक्का मार्फत् भइरहेका काम सम्पन्न भएपनि ९५ प्रतिशत मात्र विधुतिकरणको काम हुने बताए ।

बिसीका अनुसार अझै पनि ६ देखि ७ हजार घरधुरी बिजुलीबाट बञ्चित छन्। विद्युतिकरणका लागि ठेक्का भएका ठाउँमा वर्षाको समय भएकाले भनेको गतिमा कामहरू हुन नसकेको उनले बताए ।