पद्मश्री साहित्य छालबाटोलाई, शर्मालाई पद्मश्री साधना र सुवेदीलाई पद्मश्री गौरव पुरस्कार

काठमाण्डौं, १५ भदौ ।
खेमलाल हरिकला लामिछाने प्रतिष्ठानले २०८१ को ‘पद्मश्री साहित्य पुरस्कार’ रमेश भुसालको संस्मरणात्मक कृति ‘छालबाटो’ लाई दिने निर्णय गरेको ।

त्यस्तै प्रतिष्ठानले हरेक वर्ष प्रदान गर्दै आएको पद्मश्री साधना सम्मान नेपाली शिक्षा परिषद्की अध्यक्ष रमा शर्मा र पद्मश्री गौरव पुरस्कार डा. अभि सुवेदीले दिने निर्णय गरेको छ ।

पुरस्कार चयन समितिको सिफारिसको निर्णय अनुसार बालबाटोलाई पद्मश्री साहित्य, शर्मालाई पद्मश्री साधना र सुवेदीलाई पद्मश्री गौरव पुरस्कार दिन लागिएको खेमलाल हरिकला लामिछाने प्रतिष्ठानका अध्यक्ष जीवा लामिछानेले प्रेस विज्ञप्ति मार्फत जनाएका छन् ।

पुरस्कारको राशि जनही अक्षरेपी तीन लाख नगद तथा सम्मानपत्र रहेको छ । यी पुरस्कार तथा सम्मान कोजाग्रत पूर्णिमाको दिन अर्पण गरिने प्रतिष्ठानले जनाएको छ ।

खेमलाल हरिकला लामिछाने प्रतिष्ठानले २०६३ सालदेखि नेपाली साहित्य क्षेत्रका उत्कृष्ट कृति र साहित्यमा योगदान पुर्याउने साहित्यकारलाई तीन वटा बिधामा पद्मश्री पुरस्कार प्रदान गर्दै आएको छ ।

पुरस्कार चयन समितिले प्रतिष्ठानलाई प्राप्त २०८१ सालमा प्रकाशित नेपाली साहित्यका २०३ वटा पुस्तकमध्ये गत असार १५ गते विस्तारित सूची र साउन १५ गते उत्कृष्ट संक्षिप्त सूची प्रकाशित गरेको थियो । ती कृतिमध्ये पुरस्कार चयन समितिको सिफारिस अनुसार रमेश भुसालको संस्मरणात्मक कृति ‘छालबाटो’लाई वि।सं। २०८१ को ‘पद्मश्री साहित्य पुरस्कार’ अर्पण गर्ने निर्णय गरिएको अध्यक्ष लामिछानेले बताएका छन् ।

भुसालको ‘छालबाटो’ले कैलाश मानसरोवर हुँदै तिब्बतस्थित कर्णालीको उद्गम र भारतको गङ्गासम्मको यात्रामा कर्णालीको प्रवाह, सीमा सुरक्षा, स्थानीय बस्ती, जलवायु परिवर्तन, वन्यजन्तु, जलविद्युत् र विस्थापनजस्ता गम्भीर विषयलाई नियात्रामार्फत् जीवन्त रूपमा समेटेको छ ।

प्रत्येक वर्ष नेपाली साहित्य, संगीत र कलाको क्षेत्रमा दीर्घसाधना गरेर उत्कृष्ट योगदान पुर्याएका दीर्घसाधकलाई प्रदान गरिने पद्मश्री साधना सम्मान यस वर्ष नेपाली शिक्षा परिषद्की अध्यक्ष रमा शर्मालाई अर्पण गर्ने निर्णय गरिएको छ । आफ्नो सम्पूर्ण जीवन भाषा, साहित्य, संस्कृति र कलाको उन्नयनमा समर्पित रमा शर्माका अन्वेषण, समालोचना, जीवनी, निबन्ध, भाषा, बालसाहित्य लगायतका करिब दुई दर्जन पुस्तकहरू प्रकाशित छन् ।

त्यसैगरी, समाजका विविध क्षेत्रमा उत्कृष्ट योगदान पुर्याएवापत प्रदान गरिने ‘पद्मश्री गौरव पुरस्कार’ यस वर्ष प्रा. डा. अभिनारायण सुवेदीलाई प्रदान गर्ने निर्णय गरिएको छ ।

नेपाली र अङ्ग्रेजी दुवै भाषामा कलम चलाउने निबन्धकार, समालोचक, भाषाविद्, नाटककार, अनुवादक तथा कवि प्रा. डा.अभि सुवेदीका करिब तीन दर्जन कृति प्रकाशित छन् । उनी साहित्य सिर्जना तथा समसामयिक लेखनमा अत्यन्तै सक्रिय छन् ।