सभामुख घिमिरेको आग्रह : संसद् अवरुद्ध नगर्नुहोस्, सहमतिको थलो बनाऔँ

काठमाडौँ- प्रतिनिधिसभाका सभामुख देवराज घिमिरेले संसद्लाई निरन्तर अवरुद्ध गर्ने प्रवृत्ति लोकतान्त्रिक अभ्यासका लागि हानिकारक हुने बताएका छन्। उनले संसद् असहमति अभिव्यक्त गर्ने स्थल नभई राष्ट्रिय सहमतिको आवाज प्रकट गर्ने थलो भएको स्पष्ट पार्दै सबै दल र सांसदलाई संवादको वातावरण बनाउन अपिल गरेका हुन्।

प्रतिनिधिसभाको शुक्रबारको बैठकमा सभामुख घिमिरेले भिजिट भिसा प्रकरणलगायतका मुद्दा उठाउँदै प्रतिपक्षी सांसदहरू लामो समयदेखि बैठक बहिष्कार गर्दै आएकोमा चिन्ता व्यक्त गरे। उनले आफूले सहमतिका लागि सम्भाव्य सबै पहल र संवादको मार्ग अपनाए पनि अपेक्षित परिणाम नआएको जानकारी गराए।

‘बैठक सुरु हुनासाथ असहमति प्रदर्शन गरेर बाहिरिने प्रवृत्ति दीर्घकालीन रूपमा हानिकारक साबित हुन सक्छ’, उनले भने, ‘हामी भविष्यलाई के सन्देश दिइरहेका छौँ भन्ने विषयमा सबै सचेत रहनु आवश्यक छ।’

घिमिरेले संघीय लोकतान्त्रिक गणतन्त्र सुदृढ पार्न प्रत्यक्ष सम्बन्धित विधेयकहरू संसद्‌मा बहस र पारित हुने प्रक्रियामा रहेको भन्दै सबै सांसदलाई गम्भीर र रचनात्मक छलफलमा सहभागी हुन आग्रह गरे। सभामुखले प्रधानमन्त्री स्वयंले बैठकमा सम्बोधन गर्ने समय लिएको जानकारी दिँदै बैठकलाई फलदायी बनाउन सांसदहरूको पूर्ण उपस्थिति आवश्यक रहेको दोर्‍याए।

सभामुख घिमिरेले भने, ‘म फेरि पनि सरकार, प्रतिपक्ष र सत्तापक्षका सबै दललाई संवादको वातावरण सिर्जना गरी संसद्लाई आफ्नो मूल लयमा फर्काउन अपिल गर्दछु।’