टी-२० अभ्यास खेलमा नेपालद्वारा एसीटी ४१ रनले पराजित, सन्दीपले लिए ५ विकेट
काठ्माण्डौँ । पहिलो अभ्यास खेलमा नेपालले अष्ट्रेलियन क्रिकेट टेरीटरीमाथि ४१ रनको जीत निकालेको छ । मंगलबार बिहान लेगस्पिनर सन्दीप लामिछानेले ह्याट्रिकसहित ५ विकेट लिएपछि १७८ रनको लक्ष्य पछ्याएको टेरीटरी १७ ओभर २ बलमा १३६ रनमा समेटियो ।
४ ओभर बलिङ गरेका सन्दीपले ३१ रन खर्चेर ह्याट्रिकसहित ५ विकेट लिए । करण केसीले दुई तथा रुपेश सिंह र कुशल भुर्तेलले एक/एक विकेट लिए । टेरीटरीका जेक स्मिथले सर्वाधिक ५० रन बनाए । जाक केघले २५ रन बनाए । काइ ब्रंकरले अन्त्यतिर केही आकर्षक शटहरू खेल्दै २६ रनमा अविजित रहे ।
त्यसअघि टस हारेर पहिले ब्याटिङ गरेको नेपालले २० ओभरमा ८ विकेट गुमाएर १७७ रन बनाएको थियो । नेपालका लागि ओपनर आसिफ शेखले ३८ बलमा ४ चौका र ५ छक्कासहित सर्वाधिक ६९ रन बनाए । कप्तान रोहित पौडेलले ३६ रन बनाए ।
नेपालले आजै दोस्रो टी-२० पनि खेल्नेछ भने त्यसपछि २८ र ३० अगस्टमा साउथ अस्ट्रेलियाको टिमसँग पनि २ टी-२० र एक वान डे खेल खेल्नेछ ।
टप एन्ड टी-२० सिरिजमा पनि नेपाल ११ टिममध्ये आठौं भएको थियो । नेपालको आगामी विश्वकप छनोटको तयारीका लागि अस्ट्रेलिया टुर महत्वका साथ हेरिएको छ ।
ट्रेन्डिङ
सम्बन्धित
