कक्षा चारको पाठ्यक्रम जनक शिक्षा सामग्रीमा ल्याउने तयारीमा छाैँ : मन्त्री पन्त

काठ्माण्डौँ । शिक्षामन्त्री रघुजी पन्तले निजी क्षेत्रले छापिरहेको कक्षा चारको पाठ्यक्रम वा पाठ्यपुस्तक जनक शिक्षा सामग्रीमा ल्याउन प्रयत्न गरिरहेको बताएका छन् ।

आइतबार बसेको विधायन व्यवस्थापन समितिको बैठकमा बोल्दै उनले निजी क्षेत्रले कक्षा एकदेखि चारसम्मका पाठ्यक्रम छापिरहेको जानकारी गराउँदै कक्षा चारको पाठ्यक्रम जनक शिक्षा सामग्रीमा ल्याउन छलफल गरिरहेको बताएका हुन् ।

‘अहिले प्रचलन के छ भने एक कक्षादेखि चार कक्षासम्मको किताब निजी क्षेत्रलाई छाप्ने अरू किताब चाहिँ जनक शिक्षा सामग्रीले छापिरहेको छ । त्यहाँ हामीले छलफल गरिरहेका छौँ । एक, दुई, तीन, चारमा चार कक्षा चाहिँ सरकारमा ल्याऔँ । एक, दुई, तीन चाहिँ उनीहरूको नघटाइ दिऊँ,’ मन्त्री पन्तले भने ।

उनले पहिले जनक शिक्षाले छाप्न नसक्दा निजी क्षेत्रले छापिरहेको र उनीहरूले मेसिनको आपूर्ति गरिरहेको भन्दै यसमा केही जटिलता आए मन्त्रालयमा छलफल गरिनेसमेत बताए ।