कति प्रधानमन्त्री भइरहने भन्नेलाई देउवाको जवाफ- जनताले भोट हाल्छन् त के गर्ने मैले ?
४ भदौ २०८२ १८:४२
काठमाडौं । नेपाली कांग्रेसका सभापति शेरबहादुर देउवाले अहिलेसम्म प्रत्यक्ष निर्वाचन लडेर नै प्रधानमन्त्री भएको बताउँदै कति प्रधानमन्त्री भइरहने ? भनेर गरिएको प्रश्नमाथि आलोचना गरेका छन् ।
बुधबार काठमाडौंमा स्व. प्रदीप गिरीको स्मृतिमा आयोजित राजनीतिमा निष्ठा र नैतिकता विषयक विमर्श कार्यक्रममा बोल्दै उनले धेरैले कति प्रधानमन्त्री भइरहेको भन्दै प्रश्न गर्ने गरेको बताउँदै जनताले भोट हाल्छन् त के गर्ने मैले ? भन्दै प्रतिप्रश्न गरे ।
उनले भने, ‘यहाँ धेरै साथीहरूले कुरा उठाएका छन् अब आफ्नै विषयमा उठाएको कुरालाई मैले के भन्ने । कति प्रधानमन्त्री भइरहने भन्नुभयो । म कहाँ भएको छु, जनताले भोट हाल्छन् त के गर्ने मैले ? पार्टीका सांसदहरूले सहयोग गरे, सबै पार्टीहरूले सहयोग गरेर प्रधानमन्त्री भएको हो म । त्यस कारण एउटा सौभाग्यशाली व्यक्ति पनि हो । अहिलेसम्म म प्रत्यक्ष निर्वाचन लडेको हो जहिल्यै पनि । सौभाग्यले कहिले पनि हारेको छैन ।’
उनले डडेलधुराबाट आफूलाई हटाउन पार्टीका नेताहरू आफ्नो खिलाफमा लाग्दा पनि निर्वाचन जितेको बताए । जनता भन्दा ठूलो कोही नभएको बताउँदै सभापति देउवाले सबैले जनताको सेवा गरी मन जित्ने काम गर्नुपर्नेमा जोड दिए ।
‘धेरै पार्टीका नेता साथीहरू मेरो खिलाफमा लाग्नुभयो, मलाई डडेलधुराबाट हार्छ भनेका थिएँ, तै पनि जितेछु । त्यसैले जनता सबैभन्दा ठूलो कुरा हो । जनतालाई त्यही कारण सार्वभौम सम्पन्न जनता भनेका छौँ । जनता देशको मालिक हो । जनता भन्दा ठूलो कोही छैन । त्यसैले सबै साथीहरूले जनताको सेवा गरौँ जनताको मन जित्ने काम गरौँ,’ उनले भने ।
ट्रेन्डिङ
सम्बन्धित
