पुटिनलाई ट्रम्प पत्नी मेलानियाको पत्र

वासिङ्टन डिसी । अमेरिकी राष्ट्रपति डोनाल्ड ट्रम्पले आफ्नी श्रीमती मेलानियाको पत्र रुसी समकक्षी भ्लादिमिर पुटिनलाई अलास्कामा हस्तान्तरण गरेका छन्। ह्वाइट हाउसका अधिकारीहरूले समाचार एजेन्सी रोयटर्सलाई दिएको जानकारी अनुसार पत्रमा युक्रेन र रुसमा बालबालिकाले सामना गर्ने कठिनाइहरूको मुद्दा उठाइएको छ।

स्लोभेनियामा जन्मिएकी मेलानिया राष्ट्रपति ट्रम्पको अलास्का भ्रमणमा साथमा थिइनन्। तर अधिकारीहरूले उनले पत्रमा युद्धको समयमा बालबालिकाको अवस्थाको बारेमा उल्लेख गरेको बताएका छन्।

फेब्रुअरी २०२२ मा रुसले युक्रेनमा आक्रमण गरेपछि कम्तीमा १९ हजार ५०० युक्रेनी बालबालिका डिपोर्ट गरिएको युक्रेनी सरकारको अनुमान छ । युक्रेनका अनुसार यी बालबालिकालाई रुस वा रुसले कब्जा गरेको क्षेत्रमा लगिएको छ।

अन्तर्राष्ट्रिय फौजदारी अदालतले सन् २०२३ मा बालबालिकाको कथित गैर कानुनी निर्वासनको आरोपमा पुटिन र उनका बाल अधिकार आयुक्त मारिया ल्वोभाबेलोभाविरुद्ध पक्राउ वारेन्ट जारी गरेको थियो।