दैनिक एक हजारभन्दा बढीले पार्टी सदस्यता लिइरहेको रास्वपाको दाबी

काठमाडौं । राष्ट्रिय स्वतन्त्र पार्टी (रास्वपा)ले दैनिक एक हजारभन्दा बढीले आफ्नो पार्टीको सदस्यता लिइरहेको दाबी गरेको छ । बिहीबार पार्टी केन्द्रीय कार्यालयमा आयोजित एक कार्यक्रममा रास्वपाका प्रवक्ता मनिष झाले अहिले पार्टी प्रवेश गर्नेको लर्को लागेको दाबी गरे ।

“अहिले हामीकहाँ दैनिकरूपमा हजार जनाभन्दा बढीले सदस्यता लिइरहनुभएको छ,” उनले भने ।

बिहीबार सशस्त्र प्रहरी बलका सेवा निवृत्त डीआईजी दुर्गा भट्टराई र अर्का सेवा निवृत्त एसएसपी विश्वेश्वर थापासहित रास्वपा प्रवेश गरेका छन् ।

यस्तै, अन्तर्राष्ट्रिय लायन्स क्लबका पूर्वगभर्नर शोभा जोशी, नेपाली सेनाका पूर्वकर्नेल डा. प्रद्युम्न पौडेल पनि रास्वपामा प्रवेश गरे ।