दार्चुलामा बाढीले तीन पुल बगायो

दार्चुला । टिंकर खोलाको बाढीले छांगरुदेखि टिंकरसम्मका तीन स्थानका पुल बगाएको छ । पुल बगाएपछि टिंकर गाउँसँगको सडक सम्पर्कविच्छेद भएको छ ।

टिंकर खोलापुल, नाम्पापुल र चम्लिङ खोलाको पुल बाढीले बगाएको व्याँस गाउँपालिका–१ का वीरेन्द्रसिंह तिंकरीले जानकारी दिए । टिंकरमा रहेका नेपाल टेलिकमको टावरले पनि काम नगरेको उनले बताए ।

बाढीबाट गाउँमा कुनै क्षति नभएको जिल्ला प्रहरी कार्यालयका डीएसपी प्रकाश दाहालले बताए । उनले भने, “टिंकर सीमा प्रहरीचौकीसँग सञ्चार सेटमार्फत सम्पर्क भएको छ । क्षति भएको स्थानको वस्तुस्थिति बुझ्न टिंकरबाट प्रहरी परिचालन भएका छन् ।”

छांगरुदेखि टिंकरसम्मको झन्डै ३०० देखि ४०० मिटर बाटो पनि बाढीले बगाएको छ ।