एमसीसीमा देउवा भन्दा ओली झन् कडाः प्रचण्ड

काठ्माण्डौँ- नेकपा (माओवादी केन्द्र) का अध्यक्ष पुष्पकमल दाहाल प्रचण्डले नेपाली कांग्रेसभन्दा नेकपा एमाले अमेरिकी सहयोग परियोजना मिलेनियम च्यालेन्ज कर्पोरेसन (एमसीसी) जस्ताको त्यस्तै पास हुनुपर्छ भन्नेमा बढी पक्षधर रहेको आरोप लगाएका छन्।

काठ्माण्डौँमा बुधबार आयोजित एक कार्यक्रमलाई सम्बोधन गर्दै उनले यस्तो आरोप लगाएका हुन्। एमसीसी जस्ताको त्यस्तै हुनुपर्छ भन्नेमा कांग्रेस सभापति शेरबहादुर देउवाभन्दा नेकपा एमाले अध्यक्ष केपी शर्मा ओली झनै कडा पाएको बताए।

एमसीसी जस्ताको त्यस्तै पास गर्न दिनु हुँदैन भनेर एमालेसँग छलफल गर्दा कांग्रेस भन्दा बढी पक्षधर रहेको पाएको बताए।

उनले एमसीसी जस्ताको त्यस्तै पास हुन नदिनका लागि कांग्रेस र एमालेसँग बारम्बार छलफल गर्दा पनि सहमति नजुटेपछि मन नलागी नलागी एमाले नेतृत्वसँग छलफलका लागि आफूहरू गएको तर एमालेले अपमानजनक भाषा प्रयोग गरेको आरोप लगाए।

अध्यक्ष दाहालले भने, ‘जसरी पनि एमसीसी पारित हुने भयो। हामीले रोक्नसक्ने स्थिति भएन। कांग्रेस दृढ अडानमा छ। एमाले र कांग्रेस मिलेपछि भइहाल्छ। एमाले नेतृत्वबाट सँगै समझदारी गरेको, कार्यदल बनाएकोबाट आश गरेको त झन् कडा। कांग्रेस भन्दा त केपी ओली त झन् कडा। हाम्रा केही साथीहरू त जाउँ भयो, झगडा गर्दागर्दै पनि यही विषयको गम्भीरता र महत्वलाई ध्यान दिएर देशको लागि जाने हो के लाज मान्ने हो र? देशको भलो हुन्छ भने जोसँग भएपनि वार्ता गर्न के हुन्छ भनेर अफ्ठ्यारो मानि मानि गएका थियौँ। तर यति नमिठो, यति तीतो र यति अपमानजनक भाषा उहाँले प्रयोग गर्नुभयो, कांग्रेस भन्दा त धेरै बढी रहेछ।

एमाले नेपाललाई आईपीएसको सदस्य बनाउने पहल गर्ने र एसपीपीमा सैद्धान्तिक सहमति गर्ने पार्टी भएको आरोप लगाए।

उनले भने, ‘आईपीएसको सदस्य बनाउने पनि उहाँहरू नै हो। एसपीपीसँग पनि सैद्धान्तिक सहमति गर्नेहरु पनि उहाँहरू नै हो। त्यसपछि अन्तिममा यसलाई बहिष्कार गर्ने, भोटिङमा भाग नलिने बाटो थियो। तर अनुमोदन त भइसक्थ्यो। त्यसलाई रोक्न र क्रान्ति नै शुरु गर्नसक्ने स्थिति थिएन।’

अध्यक्ष दाहालले आफूहरुको बारम्बारको प्रयासपछि मात्रै व्याख्यात्मक टिप्प्णीसहित एमसीसी पास गरिएको दाबी गरे।