आमाले छोरासँगै गरिन् १२ पास

धनगढी : धनगढीमा आमाछोराले सँगै कक्षा १२ उत्तीर्ण गरेका छन् । धनगढी उपमहानगरपालिका- ४ की ४१ वर्षीया देवकी भट्ट पडाल र उनका छोरा जीवन पडालले यसपालीको परीक्षामा सँगै कक्षा १२ पास गरेका हुन् ।

जीवनले विज्ञान संकायमा ३.४४ जीपीए अथवा ‘ए’ ग्रेड ल्याएर १२ पास गरेका हुन् भने उनकी आमा देवकीले २.८५ जीपीए अथवा ‘बी प्लस’ ल्याएर १२ पास गरेका हुन् । छोराले नियमितरुपमा पढिरहे पनि आमाले भने एक दशकको अन्तरालपछि कक्षा १२ को परीक्षा दिएकी हुन्।

देवकी धनगढी उपमहानरपालिका- ४ मा रहेको राष्ट्रिय तुल्सीराम माविमा बालविकास शिक्षिका हुन् । उनले शैक्षिक योग्यताका कारण प्रावि बाहेकका अरु कक्षामा पढाउन पाएकी थिएनन् । ‘पढाउने अनुभव भएपनि डिग्री नभएपछि पढाउन नमिल्ने रहेछ,त्यसैले छोरासँगै कक्षा १२ को परीक्षा दिएँ,’उनले भनिन् ।

उनले शिक्षा संकायमा कक्षा १२ पास गरेकी हुन् । छोराले स्नातक तहमा आईटी इन्जिनियरिङ पढने तयारी गरेको उनले बताइन् । ‘छोराले आईटी पढछु भन्छ,तर मैले वीएड पढने मनस्थिति बनाएको छु,’उनले भनिन् । ‘घरको काम, विद्यालयमा बालविकासको अध्यापनसँगै १२ को पढाइ पनि सकेँ,सफलता पाइयो,’ देवकीले खुसी हुँदै भनिन्।