कोलोराडोको गोल्डेनमा भव्य शेर्पा सांस्कृतिक केन्द्र निर्माण गरिदै

कोलोराडो, २९ जुलाई ।

युनाईटेड शेर्पा एशोसियसन अफ कोलोराडोले शेर्पा सांस्कृतिक केन्द्र निर्माण गर्ने भएको छ ।

झण्डै १५ लाख डलरको लागतमा शेर्पा एशोसियसनले कोलोराडोको गोल्डेनमा भव्य शेर्पा सांस्कृतिक केन्द्र निर्माण गर्ने भएको हो ।

शेर्पा एशोसियसनले सांस्कृतिक केन्द्र निर्माणका लागि पाँच लाख डलरमा कोलोराडोको गोल्डेनमा जग्गा लिदैछ, एशोसियसनका उपाध्यक्ष लाक्पा शेर्पाले भने, जग्गाको डील भईसक्यो । केही दिनमा जग्गाको स्वामित्व एशोसिसयनको नाममा हुनेछ ।

बोल्डरबाट करीव १८ मिनेटको दूरीमा गोल्डेनमा मूल सडकसंगै जोडिएको ८ रोपनी जग्गामा एशोसियसनले शेर्पा समुदायको संस्कृति र पहिचान झल्किने विशाल गुम्बा सहित भव्य सांस्कृतिक केन्द्र निर्माण गर्ने अध्यक्ष काजी शेर्पाले जानकारी दिए ।
सांस्कृतिक केन्द्रमा सयभन्दा बढि गाडी पार्किङका लागि स्पेश रहेको छ ।

उनले अमेरिकी भूमिमा शेर्पा समुदायको धर्म, संस्कृति, परम्परा, भाषा, भेषभुषा र मौलिक पहिचान झल्किने गरी निर्माण गरिने सांस्कृतिक केन्द्र सबै धर्मावलम्बीहरुका लागि आकर्षणको केन्द्र बन्ने विश्वास गरे ।

उपाध्यक्ष लाक्पा शेर्पाले सांस्कृतिक केन्द्र निर्माणका लागि सहयोग गर्न सबैलाई आह्वान गरे । भगवान बुद्धको बिशाल गुम्बा सहित निर्माण गरिने सांस्कृतिक केन्द्रलाई बिभिन्न राष्ट्रियता, सबैजाती, समुदाय, बर्गलाई जोड्ने विश्वास गरेका छौ, उनले भने, सांस्कृतिक केन्द्र निर्माणका लागि हामी शेर्पा समुदायसंगै देश विदेशमा रहेका नेपाली र अमेरिकी नागरिकसंगै शान्तिमार्गीहरुसंग आग्रह गर्दछौ ।

सांस्कृतिक केन्द्र निर्माणका लागि एशोसियसनले तीन लाख ५० हजार डलर संकलन गरेको थियो । जुन कोषमा उपाध्यक्ष शेर्पाले ६३ हजार डलर जम्मा गरेका थिए । सांस्कृतिक केन्द्रको जग्गा खरीदका लागि रकम अपुग भएपछि १३ जना शेर्पाले जनही २० हजार डलर सहयोग गरेका छन् । पछि फिर्ता पाउने गरी सांस्कृतिक केन्द्र निर्माणका लागि आर्थिक सहयोग गरेका उनीहरुले त्यसको व्याज भने लिने छैनन् ।