भक्तपुरमा एउटै डोरीमा झुण्डिएको अवस्थामा दिदीबहिनी मृत फेला

भक्तपुर : मध्यपुर थिमि नगरपालिका–९ सिन्टीटारमा दुई किशोरी मृत अवस्थामा फेला परेका छन् । स्थानीय निरज चक्रधरको घरको भुइँ तलामा डेरा गरी बस्दै आएका सुर्खेत पञ्चपुरी नगरपालिका–८ की १७ वर्षीया मेनुका कँडेल र १५ वर्षीया सिर्जना कँडेल मृत्य अवस्थामा भेटिएका हुन्।

उनीहरू सोही घरको प्यासेजमा एउटै डोरीमा झुन्डिएरको अवस्थामा फेला परेको जिल्ला प्रहरी परिसर भक्तपुरका प्रवक्ता ढुण्डिराज न्यौपानेले जानकारी दिए। मेनुका र सिर्जना एकै घरका दिदीबहिनी भएको प्रहरीले जनाएको छ।

घरधनीका अनुसार दुई साताअघिमात्र ती किशोरीहरू डेरामा बस्न आएका थिए । परिवारसँग भारतको मुम्बइमा बस्दै आएका उनीहरू १५ दिनअघि मात्रै काठमाडौं आएको प्रारम्भिक अनुसन्धानबाट खुलेको प्रहरीले जनाएको छ। मृतकका बुवा मुम्बइबाट काठमाडौं आउँदै गरेको र उनी आइसकेपछि मात्रै घटनास्थलको मुचुल्का हुने प्रहरीले जनाएको छ।