चर्चामा मनिष कुमार र रेखा जोशीको ‘सुन हौ कि चाँदी हौ’

खेमराज उपाध्याय, धनगढी ।
गायक मनिष कुमार र रेखा जोशीको स्वर रहेको ‘सुन हौ कि चाँदी हौ’ बोलको डेउडा स्रोता तथा दर्शकहरुले निकै रुचाएका  छन् ।

८ महिनाअघि युट्युवमा रिलिज भएको डेउडालाई पछिल्लो समय हेर्ने दर्शकहरुको संख्या ह्वात्तै बढेको छ । सुदर्शन थापाको शब्द र मनिष कुमारको संगीत रहेको डेउडालाई युट्युवमा ४७ लाख भन्दा बढि पटक हेरिएको छ ।

डेउडामा प्रेम छ । प्रेमिकाको सुन्दरताको बखान छ । संगै जिउने मर्ने रहर छन् । प्रेमिकाको त्यो रहर पुरा गर्ने प्रेमीका बाचा छन् । बिर्सिदै गएका शब्दहरु, हराउदै गएको भाका, सस्तो मनोरञ्जनका साधन बनाईदै गएको डेउडा । सुन हौ कि चाँदी हौले डेउडलाई पुनर्जीवन दिएको छ । जसका शब्दहरु ओजपूर्ण छन् । जसमा संगीतले मिठास भरेको छ । मोडेलको अभिनयले आकर्षण थपेको छ ।

उत्कृष्ट शब्द चयन, कर्णप्रिय स्वर र समधुर संगीतले डेउडालाई उत्कृष्ट बनाएको छ । बिबेक थापा कमलले निर्माण गरेको म्युजिक भिडिओमा सुदर्शन नेपालीको कथा र निर्देशन रहेको छ ।

प्रेमिकाको सुन्दरताको बर्णन गरिएको डेउडाको शुरुवातमा भन्छन्,
परी हौ कि अप्सरा हौ,सुन हौ कि चाँदी हौ,
यति राम्री काँ जन्म्या हौ, क्या फल खाँदी हौ ।

जसको प्रत्युत्तरमा प्रेमिकाले भन्छिन्,
कस्तुरी हूँ पाटनकी, पंक्षी हूँ, पाखाकी,
स्यावासी छ साईबाजकी, धन्य छ आँखाकी

प्रेमी थप्छन्,
मन मिल्या माया जाल लाउनु, क्या हेर्नुछ कुल
मैतिर फर्किजा पन, सूर्जेमुखी फूल,

प्रेमिकाले भन्छिन्,
बेल छुन हिडेका बास, क्या भनेर निहुरी
फूल तेरो, बगैचा तेरो, लैजा बाज सिउँडी

प्रेमीले जवाफ फर्काउछन्,

आत्मा न हौ छियाछिया, मन न हौ खरानी,
म हुला मुटुकको धडकन, सुवा हौ परानी,

आफ्नो धोको सुनाउदै प्रेमिका भन्छिन्,

अग्नी भन्दा पवित्र छ, गंगा है चोखो छ,
काखबसी माया दिन्या, म पन धोको छ,

प्रेमी आफ्नो चाहना व्यक्त गर्दै भन्छन्,

रात प¥या फर्केर आयई, मुल्कै डुलन्या चरी,
साईले दिनु, मैले खानु, होईजाउ जनमभरी

प्रेमिकाले सातै जुनी संगै जिउने ईच्छा प्रकट गर्छिन्,

सर्कले वर्षन आट्यो, बादल घेरीघेरी,
सातै जुनी संगै हौली, चोला फेरी फेरी,

प्रेमी किन छुटाउथे, संगै दिनरात बिताउने चाहना,

बर्खाका भुणले हो कि, अनकन्याको सेरी
दिन बितिजाउ, रात बितिजाउ, तुम्रै मुख हेरी

अन्तिममा प्रेमिका प्रेमीसंगै जिउने, संगै मर्ने ईच्छा सुनाउछिन्,

फूल फुली बासना आईजाउ, रुप्स्या चमरको,
संगै होईजाउ जिउनु मर्नु, जोली भ्रमरको

माईत जादै गरेकी श्रीमतीलाई सम्बोधनबाट शुरु भएको डेउडाका हरेक शब्दहरु मिठासपूर्ण छन् ।

सुदूर पहाडको परिवेशमा छायांकन गरिएको म्युजिक भिडिओको दृष्य, डेउडा र डेउडाको भाव अनुसार मोडेलहरुको अभिनय उत्कृष्ट छ । जसले दर्शकहरुलाई म्युजिक भिडिओमा तानिरहन्छ । म्युजिक भिडिओमा ९९९ जनाले कमेण्ट गरेका छन् । कमेण्ट गर्नेमा सुदूरपश्चिमेली मात्र नभएर देशविदेशमा नेपाली भाषीसंगै भारतको उत्तराखण्डका दर्शकहरु समेत छन् । उनीहरुले डेउडाका हरेक शब्द उत्कृष्ट भएको भन्दै प्रशंसा गरेका छन् । कतिपयले त जति पटक हेरे पनि धीत नमरेको बताएका छन् ।