सुदूरपश्चिम प्रदेश सरकार नैतिक हिसाबले ढलिसक्यो : मानबहादुर धामी

धनगढी। नेकपा (माओवादी केन्द्र) नेता एवम् सुदूरपश्चिम प्रदेश सभा सदस्य मानबहादुर धामीले सुदूरपश्चिम प्रदेश सरकार नैतिक रुपमा ढलिसकेको बताएका छन ।
अर्थसम्बन्धी प्रस्तावलाई कार्यान्वयन गर्न बनेको विधेयकमाथिको छलफलमा आज भाग लिँदै उनले अधिकांश प्रदेश सभा सदस्यले सरकारको बजेटमाथि समर्थन नजनाएकाले सरकारले नैतिकता गुमाइसकेको बताएका हुन्। प्रदेश सरकारको बजेटमाथि छलफलमा सहभागी २७ मध्ये एक/दुई जनाबाहेक बाँकी कसैले बजेटमाथि समर्थन नजनाएको उनको भनाइ थियो।
नैतिक रुपमा सरकारले आफ्नो धरातल गुमाइसकेको भन्दै धामीले एकचोटी फेरि विश्वासको मत लिन मुख्यमन्त्रीलाई आग्रह गरेका छन। उनले भने,“यो सरकार नैतिक रुपमा ढलिसकेको छ। नैतिकताका आधारमा कुर्सीमा बस्ने अधिकार छैन। मुख्यमन्त्रीज्यू तपाईंले फेरि एक पटक विश्वासको मत लिनुहोस्।”

नेता धामीले सङ्ख्यात्मक रुपमा भने सरकारले बहुदलको सुन्दर कचौरामा मेजवानी गरिरहेको जिकिर गर्दै थपे,“संसदीय व्यवस्था भैंसीको टाउको झुन्ड्याएर कुकुरको पुच्छर बेच्ने थलो बनिसकेको छ।”