इरानमाथिको आक्रमणलाई लिएर अमेरिकामै विरोध

अमेरिकामा डेमोक्र्याटिक पार्टीका नेताहरूले इरानका परमाणु केन्द्रहरूमा गरिएको अमेरिकी हवाई आक्रमणको निन्दा गरेका छन् । बीबीसीका अनुसार, कंग्रेससदस्य अलेक्जेन्ड्रिया ओकासिओ–कोर्टेजले यो कदम अमेरिकी संविधान र कंग्रेसका युद्धसम्बन्धी अधिकारको गम्भीर उल्लंघन भएको भन्दै यो राष्ट्रपति डोनल्ड ट्रम्पविरुद्ध महाभियोगको आधार बन्ने बताएकी छन् ।

उनले सामाजिक सञ्जाल ‘एक्स’मा लेखेकी छन्, ‘उहाँले अत्यन्तै हतारमा यस्तो निर्णय लिनुभयो, जसले अमेरिका दशकौँसम्म अल्झिन सक्ने युद्ध सुरु गर्न सक्छ ।’ कग्रेस सदस्य राशिदा तालिबले पनि आक्रमणको कडा आलोचना गर्दै यो अमेरिकी संविधानको गम्भीर उल्लंघन भएको र कंग्रेसले तत्काल हस्तक्षेप गर्नुपर्ने आवश्यकता रहेको बताइन् ।

उनले भनिन्, ‘हामीले विगतमा देखेका छौँ, कसरी ‘विनाशकारी हतियार’ भएको झूटा बहानामा मध्यपूर्वमा दशकौँसम्म युद्ध चलाइयो । अब फेरि हामी त्यसै झेलमा पर्न चाहँदैनौं ।’

त्यस्तै, कंग्रेसका अर्का सदस्य जिम म्याकगभर्नले यस घटनालाई ‘पागलपन’ को संज्ञा दिएका छन् । उनले भने, ‘ट्रम्पले कंग्रेसको अनुमतिबिना इरानमाथि बम खसालेर अमेरिकालाई अवैध रूपमा अर्को मध्यपूर्वी युद्धमा तानेका छन् । के हामीले अहिलेसम्म कुनै पाठ सिकेनौँ ?’