सिन्धुपाल्चोकको जनता माविका छ जना विद्यार्थीलाई छात्रवृति प्रदान
सिन्धुपाल्चोक,८ असार ।
सिन्धुपाल्चोकको मेलम्ची नगरपालिका–९ ज्यामिरेस्थित जनता माध्यमिक विद्यालयमा कक्षा १२ मा अध्ययनरत छ जना विद्यार्थीलाई छात्रवृति प्रदान गरिएको छ ।
अमेरिकाको एट्लान्टा राज्यको जर्जियामा बस्ने शौभाग्य श्रेष्ठ र उनकी पत्नी गंगा श्रेष्ठका नामबाट स्थापित शुभ गंगा छात्रवृति अक्षयकोषबाट छ जना जेहेन्दार विद्यार्थीलाई जनही पाँच हजार रुपैयाका दरले छात्रवृति प्रदान गरिएको हो ।
शुक्रवार विद्यालयमा आयोजित दाता सम्मान तथा छात्रवृति प्रदान कार्यक्रममा आयुषा खड्का, सन्देश थापा, करुणा मगर, सजिता बस्नेत, सुनिता मिजार र बिनिता थापालाई छात्रवृति प्रदान गरिएको हो ।
प्रमुख अतिथि मेलम्ची नगरपालिका वडा नम्बर ९ का अध्यक्ष किरणदीप खड्काले छात्रवृति वाफतको रकम विद्यार्थीहरुलाई हस्तान्तरण गरेका हुन् । कार्यक्रमको सञ्चालन सहायक प्रधानअध्यापक माधव अधिकारीले गरेका थिए ।
श्रेष्ठले झण्डै ५० वर्ष अघि जनता माध्यमिक विद्यालयमा एक वर्ष पढाएका थिए । तत्कालीन समयमा राष्ट्रिय विकास सेवाले एमएमा अध्ययनरत विद्यार्थीलाई अनिवार्य रुपमा एक वर्ष शिक्षण तथा सामाजिक कार्यमा खटाउथ्यो । श्रेष्ठले राविसेकै सोही कार्यक्रम अन्तर्गत एमए अध्ययनका क्रममा एक वर्ष जनता माविमा पढाएका थिए । उनले आपूmले पढाएको जनता माध्यमिक विद्यालयमा दुई वर्षअघि छ लाखको अक्षयकोष स्थापना गरेका थिए । सोही अक्षयकोषको व्याजबाट वर्षेनी छ जना विद्यार्थीलाई छात्रवृति प्रदान गर्ने गरिएको छ ।
ट्रेन्डिङ
सम्बन्धित
