देशभित्र भविष्य खोज्ने अभियानलाई चलाउनुपर्छ: अर्थमन्त्री पौडेल

काठ्माण्डौँ – उपप्रधानमन्त्री एवं अर्थमन्त्री विष्णु पौडेलले देशभित्र भविष्य खोज्ने अभियानलाई तिब्रता दिनुपर्ने बताएका छन्। कोरियाको अनुभवमा आधारित सफलताका कथाहरू नाम पुस्तकको राजधानीमा विमोचन गर्दै उनले सम्भावना हुँदाहुँदै पनि देशभित्र आफ्नो भविष्य खोज्नेहरू अहिले कमी रहेको बताएका हुन्।
अर्थमन्त्री पौडेलले प्रकृतिको वरदानका रुपमा चिनिने नेपालमा धेरै काम गर्न सकिने बताए। विदेशमा सिकेको सीप पुँजी सबैले नेपालमा उपभोग गर्नसके देश छिट्टै विकसित हुने उनको भनाइ छ।

‘भूगोलका हिसावले देश सानो छौं तर प्राकृतिक दृष्टिकोणले हामी सम्पन्न छौं। संस्कृतिक, ऐतिहासिक, पुरातात्विक, दृष्टिकोणले हामी सम्पन्न छौं। त्यसअर्थमा हामीले हाम्रो देश भित्र भविष्य खोज्नुपर्छ,’ उनले भने, ‘आजको दुनियाँमा कोही पनि आफ्नो देशभित्र रहेर अघि बढ्न सम्भव हुँदैन। विभिन्न सन्दर्भमा अध्ययनका शिलशिलामा श्रम, व्यवसायका शिलशिलामा मानिसहरू एउटाबाट अर्को मुलुकमा गइरहेका हुन्छन्।’

कोरियामा सिकेको सीप र पुँजीलाई नेपालमै सदुपयोग गरेर मुलुकलाई समृद्धिको दिशामा अघि बढाउन युवाहरूलाई पौडेलले आह्वान गरे।