अहमदाबादमा एयर इंडिया विमान दुर्घटना, २०४ को मृत्युको पुष्टि

अहमदाबाद, भारत – १२ जून

गुजरातको अहमदाबादस्थित सरदार वल्लभभाई पटेल अन्तर्राष्ट्रिय विमानस्थलबाट उडेको एयर इंडियाको उडान AI-171 लण्डनका लागि उडान भरेको केही समयमै भयानक दुर्घटनामा परेको छ।

दुर्घटनामा हालसम्म २०४ जनाको मृत्यु पुष्टि गरिएको छ भने ४१ जना गम्भीर घाइते भएका छन्।

बिहान करिब १ : ४० बजे लण्डनका लागि उडेको बोइङ AI-171 ड्रीमलाइनर विमान टेकअफ गरेको केही समयमै ६२५ फिटको उचाइमा पुगेपछि ट्रान्सपन्डर सिग्नल हराएको थियो।

पाइलटले तत्काल मे-डे  सन्देश एयर ट्राफिक कन्ट्रोललाई पठाएको भए पनि केही सेकेन्डमै विमान मेघाणी नगर क्षेत्रमा रहेको भवनसँग ठोक्किएको बताइएको छ।

विमानमा २३० यात्रु र १२ चालक दल सदस्य सहित जम्मा २४२ जना सवार थिए । विमानका चालक क्याप्टेन सुमीत सभरवाल र फर्स्ट अफिसर क्लाइभ कुन्दर थिए ।

जसमा मृतकहरूमा १६९ जना भारतीय, ५३ जना बेलायती, ७ जना पोर्चुगाली र १ जना क्यानाडाली नागरिक थिए।

विमानको टुक्रा एक मेडिकल कलेजको होस्टलमा खसेपछि आसपासको क्षेत्रमा पनि आगलागी भएको छ।
कम्तीमा ५ जना स्थानीय बासिन्दाको मृत्यु जमिनमै भएको जानकारी प्राप्त भएको छ।

प्रधानमन्त्री नरेन्द्र मोदीले ट्वीटमार्फत शोक व्यक्त गर्दै पीडित परिवारप्रति समवेदना प्रकट गरेका छन् ।
गृह मन्त्री अमित शाह र नागरिक उड्डयन मन्त्री के. राममोहन नायडूले घटनास्थलको जानकारी लिँदै गुजरात सरकारसँग राहत कार्य समन्वय गरिरहेका छन्।

यो बोइङ ७८७- ८ ड्रीमलाइनर विमानको हालसम्मकै सबैभन्दा गम्भीर दुर्घटना मानिएको छ।
बोइङ कम्पनीले भारतीय अधिकारीहरूसँग मिलेर पूर्ण अनुसन्धानमा सहयोग गर्ने जानकारी दिएको छ। घटनाको विस्तृत रिपोर्ट आउन बाँकी छ।