पाकिस्तानको लागि जासुसी गरेको आरोपमा भारतीय युट्युबर पक्राउ

काठमाडौं । पाकिस्तानको लागि जासुसी गरेको आरोपमा भारतीय युट्युबर ज्योति मल्होत्रा पक्राउ परेकी छन् ।हरियाणाको हिसार निवासी मल्होत्रालाई केही दिनअघि नै प्रहरीले पक्राउ गरे पनि हालै मात्र घटनाबारे खबर बाहिरिएको हो ।

मल्होत्राको ‘ट्राभल विथ जो’ नामक युट्युब च्यानलमा ३.७८ लाख सब्सक्राइबर छन् र उनलाई सामाजिक सञ्जालमा लोकप्रिय अनुहार मानिन्थ्यो । मल्होत्राका इन्स्टाग्राममा १.३३ लाख, फेसबुकमा ३.२१ लाख फलोअर्स छन् । उनी मनाली, मसूरी, जैसलमेर, जयपुर र कश्मीर जस्ता भारतका विभिन्न पर्यटकीय स्थलहरूमा भ्लगहरू बनाएर लोकप्रिय भएकी थिइन् ।

अनुसन्धान एजेन्सीहरूले ज्योतिको पाकिस्तान भ्रमण र त्यहाँका केही व्यक्तिहरूसँगको उनको भेटघाट शङ्कास्पद रहेको दाबी गरेका छन् । सामाजिक सञ्जालमा भाइरल भएको एउटा तस्वीरमा उनी पाकिस्तानी उच्चायुक्तको पार्टीमा अन्य भारतीय भ्लगरहरूसँग देखिएकी थिइन् । यहीँबाट उनको कथित जासुसीको कथा सुरु भएको भारतीय सञ्चारमाध्यमको दाबी छ ।

प्रहरी स्रोतका अनुसार ज्योतिलाई विदेशी एजेन्टहरूले पाकिस्तानको सकारात्मक छवि देखाउन र यसको नीतिहरूको पक्षमा प्रचार गर्न रोजेको दाबी छ । साथै, पाकिस्तानमा उनको व्यवहार शङ्कास्पद रहेको र उनी देशको सुरक्षाको लागि खतरा मानिने केही व्यक्तिहरूसँग सम्पर्कमा रहेको भनिएको छ ।

अदालतले उनलाई पाँच दिन हिरासतमा राखेर अनुसन्धान गर्न अनुमति दिइसकेको एसपी हिसार शशांक कुमार सावनले जानकारी दिए ।

तीन पटक पाकिस्तान भ्रमण

पहलगाम आतंकवादी घटना र अपरेसन सिन्दुरपछि केन्द्रीय अनुसन्धान एजेन्सी आईबीले संदिग्धहरूको सूचीमा समावेश गरेको थियो ।

देशको गुप्तचर जानकारी साझा गर्ने बारेमा इनपुट प्राप्त भएपछि ज्योतिको मोबाइल फोन र सामाजिक सञ्जाल खाताहरू ट्रेस गरिएको थियो ।

हिसारका डीएसपी कमलजीतले भने, “नयाँ अग्रसेन एक्सटेन्सन कोलोनीकी निवासी ज्योतिले ट्राभल विथ जो नामको युट्युब च्यानल चलाउँछिन् । अनुसन्धानबाट उनी सन् २०२३ मा भिसा लिन पाकिस्तान उच्चायोग गएको खुलासा भएको छ । त्यहाँ उनको भेट एहसान उर रहिम उर्फ ​​दानिशसँग भयो । यसपछि उनले दानिशलाई फोनबाट सम्पर्क गर्न थालिन् र तीन पटक पाकिस्तानको यात्रा गरिन् । दानिशको अनुरोधमा उनले पाकिस्तानमा उनका परिचित अली अहवानलाई भेटिन् । अली अहवानले ज्योतिको बसाई र यात्राको व्यवस्था गरे र पाकिस्तानी गुप्तचर अधिकारीहरूसँग उनको भेटघाटको पनि व्यवस्था गरे ।”

ज्योतिले प्रहरीलाई बताएअनुसार दानिशको सल्लाहमा उनले पाकिस्तानी इन्टेलिजेन्स अपरेटिभ ९पीआईओ० शाकिर उर्फ ​​राणा शाहबाजलाई भेटिन् र उनको मोबाइल नम्बर पनि लिएकी थिइन् ।

डीएसपीले भने, “कसैलाई थाहा नहोस् भनेर ज्योतिले शाकिरको फोन नम्बर जाट रन्धावाको नामले आफ्नो मोबाइलमा सेभ गरिन् । भारत आएपछि उनी व्हाट्सएप, स्न्याप च्याट, टेलिग्राम मार्फत शाकिर र अरूसँग सम्पर्कमा रहन थालिन् र उनीहरूलाई राष्ट्रविरोधी जानकारी दिन थालिन् ।”

भारत सरकारको विदेश मन्त्रालयले जासुसीको आरोपमा दानिशलाई वान्टेड घोषित गरेको छ ।

आईबीबाट इनपुट प्राप्त गरेपछि हिसार प्रहरीले ज्योतिको सामाजिक सञ्जाल खाताहरूको निगरानी गर्न थाल्यो । उनका भिडिओ र फोन कलहरू पनि जाँच गरियो ।

प्रहरीले उनलाई शुक्रबार राति करिब २ बजे पक्राउ गरेको थियो । प्रहरी स्रोतका अनुसार ज्योतिले भारतीय सैन्य अड्डाहरूसँग सम्बन्धित संवेदनशील जानकारी पाकिस्तानलाई पठाउँथिन् ।

पाकिस्तानी एजेन्सीहरूले सामाजिक सञ्जालमा पाकिस्तानको सकारात्मक छवि देखाउन ज्योतिलाई सक्रिय रूपमा प्रयोग गरे । प्रारम्भिक अनुसन्धानबाट ज्योतिको जनअधिकार अधिकृतको एक व्यक्तिसँग घनिष्ठ सम्बन्ध रहेको खुलेको छ ।

हिसार प्रहरीले पाकिस्तानको लागि जासुसी गर्ने अन्य पाँच जनालाई पक्राउ गरेको छ । यसमा मल्होत्रा का साथीहरू समावेश छन् ।

यता, ज्योतिका बुवा हरिश मल्होत्राले मिडियासँग कुरा गर्दै भने, ‘मेरी छोरी दिल्लीमा बस्दा महिनामा २०(२५ हजार रुपैयाँ कमाउँथिन् । कोभिडपछि उनी हिसार फर्किइन् । ज्योतिले यात्रा भ्लगिङको शौकको लागि मात्र युट्युब सुरु गरेकी थिइन्, तर अहिले उनीमाथि लगाइएका आरोपहरू स्तब्ध पार्ने खालका छन् ।”