ट्रम्पले दोस्रो कार्यकालमा दक्षिण एसियाप्रति खासै चासो देखाउने छैनन् : सुहासिनी हैदर

बंगलादेशप्रति भने ट्रम्पको दृष्टिकोण नकारात्मक हुने हैदरको भनाइ छ । ‘उनले बंगलादेशको यसअघि नै आलोचनासमेत गरिसकेका छन् । अहिलेको सरकारका प्रमुख सल्लाहकार प्रजातन्त्र पक्षधर पनि हुन्,’ उनले भनिन् । ट्रम्पले प्रजातन्त्र र मानव अधिकारसम्बन्धी विषयमा पनि खासै चासो नदेखाउने हैदरको भनाइ छ । ‘ट्रम्पले मानव अधिकार, अल्पसंख्यकको अधिकार र प्रेस स्वतन्त्रताप्रति पनि उनले खासै चासो देखाउने छैनन् । बाइडेनले लोकतान्त्रिक विमर्शहरूमा सहभागिता जनाएका थिए,’ उनले भनिन् ।अफगानिस्तानमा सेना नभएकाले पनि ट्रम्पले पहिलो कार्यकालमा जति पनि दक्षिण एसियामा खासै रुचि नदेखाउने उनले बताइन् । पहिलो कार्यकालमा झैं यसपल्ट पनि ट्रम्पको राजनीतिक शैली हेर्न भने रुचिकर हुने उनको भनाइ छ । ‘ट्रम्पको यस कार्यकालमा पनि उनले बोल्ने शैली, उनका ट्विट, व्यक्तिगत रूपमा वार्ता गरेर अर्को दिन सार्वजनिक गर्ने उनको शैली रुचिकर हुन सक्छ,’ उनले भनिन् ।

भारतीय एजेन्टहरूको सक्रियतामा अमेरिकामा हत्या भएको भन्ने कुरा पनि ट्रम्पको कार्यकालमा शान्त हुने नयाँदिल्लीले अपेक्षा गरेको हैदरले जनाएकी छिन् । अमेरिकी सरकारले भारतीय मूलका अमेरिकी नागरिक गुरपतवन्त सिंह पन्नुनको हत्यामा भारतका पूर्व गुप्तचर अधिकारी विकास यादवको हात रहेको आरोप लगाएको थियो ।