१० महिनामै १९ खर्ब रेमिट्यान्स, वैशाखमा मात्रै दुई खर्ब ५७ अर्ब

काठमाडौं । नेपालमा वैदेशिक रोजगारीबाट आउने रेमिट्यान्स (विप्रेषण) आय उल्लेखनीय रूपमा बढेको छ । नेपाल राष्ट्र बैंकका अनुसार, चालु आर्थिक वर्ष २०८२/८३ को पहिलो १० महिनामा रेमिट्यान्स ४१.२ प्रतिशतले बढेर १९ खर्ब १६ अर्ब ९० करोड रुपैयाँ पुगेको नेपाल राष्ट्र बैंकको पछिल्लो तथ्यांकले देखाएको छ । अघिल्लो वर्ष सोही अवधिमा रेमिट्यान्स वृद्धि १३.३ प्रतिशत मात्रै रहेको थियो ।

राष्ट्र बैंकले सार्वजनिक गरेको ‘हालको आर्थिक तथा वित्तीय स्थिति’ प्रतिवेदनअनुसार वैशाख महिनामा मात्रै दुई खर्ब ५७ अर्ब ४९ करोड रुपैयाँ रेमिट्यान्स नेपाल भित्रिएको छ । अमेरिकी डलरमा पनि रेमिट्यान्स ३३ प्रतिशतले वृद्धि भएको छ ।

रेमिट्यान्स आप्रवाह बढेसँगै देशको विदेशी मुद्रा सञ्चिति, चालु खाता र शोधनान्तर स्थिति पनि मजबुत बनेको राष्ट्र बैंकले जनाएको छ ।